Dźensa je so w Budyskim Serbskim domje přihotowanski wuběrk Domowiny za planowanje „Lěta župow” skonstituował. Koronapandemije dla je so start dźěławosće něšto měsacow přestorčił. Gremij ze zastupjerjemi župow, zarjada třěšneho zwjazka a Serbskeho instituta ma w nadawku zwjazkoweho předsydstwa stoćiny załoženja župow dnja 24.7.1921 we Wojerecach organizować, kotrymž chce Domowina cyłe lěto wěnować. K tomu so Dawid Statnik, předsyda Domowiny, wupraja:„Smy sej přezjedni: W srjedźišću ,Lěta župow’ steji wuměna mjez župami a mjezsobne zeznaće ludźi wšelakich kónčin. Župy su reprezentanća wosebitosćow regionow, w kotrychž smy jako Serbja kruće zakorjenjeni. Ale hdyž prajimy ,běchmy, smy, budźemy’, myslimy na cyły serbski lud a cyłu Łužicu – naš serbski swět je wjele wjetši, hač smy sej hustodosć wědomi. Tohodla chcemy, zo so župy ze zaměrnym mjezsobnym přeprošowanjom bóle ze serbskimi wašnjemi susodow zeznajomja.Hladajo na wjele korony dla přestorčenych zarjadowanjow njeje zmysłapołne, retomas přidatnych ewentow produkować. Nimo toho dyrbimy so na to nastajić, zo njebudźe tež klětu pandemije dla čas za masowe swjedźenja na dotal zwučene wašnje. Smy so na to dojednali, zo so ,Lěto župow’ 24. julija 2021 zahaji a hač do lěća 2022 traje. Wjeršk budźe na kóncu we Wojerecach, wšako su woni tehdom w ,Radnej pincy’ župy załožili. Hač do spočatka ,Lěta župow’ chcemy swoje informaciske publikacije wo regionalnych strukturach wobnowić. Přichodne wuradźowanje wuběrka budźe 15. decembra – potom hižo na zakładźe protyčki konkretnych podawkow.”