Dźensa je so na žurli Serbskeho domu w Budyšinje zetkanje mjez Domowinu a zjednoćenstwom „Serbski sejm” wotměło. Kóždy bok bě z dźesać zastupjerjemi wobdźěleny. Po tym so Dawid Statnik, předsyda Domowiny, wupraja: „Smy iniciatiwu ,Serbski sejm’ do Serbskeho domu přeprosyli. Z mojeho wida běše to wólna wuměna w přijomnej a wotewrjenej atmosferje. Smy zetkanje za to wužiwali, zhonić wo skutkowanju iniciatiwy a tež wo našich nahladach informować. Tež sym so zastupjerjam iniciatiwy za jich prócowanje wo prawa serbskeho ludu dźakował.My jako Domowina smy prěnjotnje na wobsahi wosebje na kubłanskopolitiskim polu wusměrjeni a njewidźimy diskusije wo změnje zakonjow jako abstraktny zaměr, ale w zmysle: Što konkretnje serbskej rěči tyje? So wě, zo njeje z našeho wida priwatnje, w nadawku njezapisaneho towarstwa organizowane wothłosowanje z listami, na kotrymž je so relatiwnje mały dźěl Serbow wobdźěliło, wuzwolenje ,ludoweho zastupnistwa’. Potajkim ani prawnisce ani politisce tajke něšto kaž ,serbski sejm’ njeekstistuje. Najebać to prócowarjow iniciatiwy přeprošamy, za swoje předstawy w ramiku dźěławosće třěšneho zwjazka wabić. Hižo na zašłej hłownej zhromadźiznje Domowiny móžachu swoje ideje předstajić. Jako bazodemokratiska narodna organizacija serbskeho ludu smy přeco wotewrjeni za nowych čłonow a nowe impulsy. Domowina je dwójce demokratisce legitimowana: nutřkownje jako třěšny zwjazk dwěsćě serbskich cyłkow ze zastupjerkami a zastupjerjemi, kotřiž su wot wolenych delegatow serbskich towarstwow woleni; wonkownje jako zakonsce připóznata zastupjerka serbskich zajimow w Sakskej a Braniborskej. Tak smy hakle njedawno docpěli, zo stej samo zwjazkowy sejm a zwjazkowa rada serbski lud w zakonju wo zesylnjenju strukturow brunicowych rewěrow zakótwiłoj, a nětkole budźemy na postajenju a zwoprawdźenju konkretnych naprawow spěchowanja serbskeju rěče a kultury sobu skutkować.Tohodla je naš poskitk: Dajće nam hromadźe dale wotewrjenje a transparentnje wo tym diskutować, štož serbskemu ludu tyje – a přichodnje z jednym hłosom w zajimje Serbow po cyłej Łužicy a zwonka njeje agěrować. My smy k tomu zwólniwi a widźimy w dźensnišim zetkanju prěnju kročel do tutoho směra. Poskitk zhromadneho dźěła pod třěchu Domowiny zmóžni wuměnu ze wšěmi relewantnymi akterami serbskeje ciwilneje towaršnosće. To je naš poskitk na dobro serbskeho ludu.”