Zwjazkowe předsydstwo Domowiny je so na swojim prěnim lětušim posedźenju na starej šuli w Židźinom pola Wojerec schadźowało – najebać wjele zamołwjenjow dla chorosće. Jědnaće hosći je z wokolin a města přichwatało, zo bychu najwyši gremij třěšneho zwjazka dožiwić a swoje nalěznosće Domowinje posrědkować móhli. Konkretne lokalne a regionalne prašenja stejachu na spočatku a w srjedźišću wuradźowanja. Prědsyda skupiny serbskeje narodneje drasty Židźinoho, Uwe Schuster, je lětdźesatki dźěławosće swojeho towarstwa předstajił. Jim je wažne, narodne drasty a serbske nałožki swěru po tradiciji pěstować. Weronika Bóswankowa powědaše wo zahoritym serbskim spěwanju chóra w Židźinom njedźiwajcy toho, zo jenož mało spěwarjow serbsce rozumi. Předsyda Domowiny, Dawid Statnik, mjenowaše skutkowanje lokalnych akterow připóznajo „swětłownju“ regiona a chwaleše jich wědomje při hajenju serbskeje wjesneje identity. „Domowinje su wšě regiony runohódne, smy tež dźakowni za kritiske pokiwy a chcemy so rady w dialogu ze Załožbu za serbski lud a politiskimi zamołwitymi za to zasadźować, zo so kóšty za jězby a hladanje originarnych drastow bóle w spěchowanju wobkedźbuja.” Samo po přestawce so ćiła wólna wuměna wo prašenjach wozrodźenja serbšćiny wuwiwaše. Nawodnica Rěčneho centruma Witaj, dr. Beata Brězanowa, widźi Krabatowy młny krok po kroku jako přichodnu nowu serbsku instituciju a swětłownju Wojerowskeho regiona a so při tym na dale a wjac serbskich projektow w Čornym Chołmcu złožuje.Přitomni čłonojo zwjazkoweho předsydstwa mjez druhim wotličenje lońšeho hospodarskeho plana třěšneho zwjazka a přehlad 25 projektow na wědomje wzachu, kotrež su ze srědkami třećich financowane. Tu so na přikład nowy serwisowy běrow za serbsku rěč w nošerstwje Domowiny we Wojerecach jewi, kiž je pjenježnje w nowym serbskim komunalnym programje Sakskeje zakótwjeny. Kathrin Šwjelina, pśedsedarka Rady za nastupnosći Serbow pśi Bramborsekm krajnem sejmje, informěrujo wó napšawach za pólěpšenje imaga dolnoserbšćiny a konkluzijach z ewaluacije wucby serbšćiny. Wažne jo móžnosć nawuknjenja serbskeje rěcy wót źiśownje až do studiuma. Rada za serbske naležnosće Swobodneho stata Sakskeje je drje wotpowědujo personalnym namjetam Domowiny a Sakskeho zwjazka městow a gmejnow wolena, ale budźe so hakle konstituować, kaž Dawid Statnik informowaše. Dwě aktualnej debaće je Jan Nuk namjetował. Najprjedy diskutowachu wo temje „Wutworjenje dweju rjadownjow w přichodnym pjatym lětniku Serbskeje wyšeje šule Ralbicy.” Zaměr Domowiny, tak Statnik, je w Ralbicach a druhdźe w Serbach „škit socialnych rumow šulerjow”. Tohodla sej zwjazkowe předsydstwo zasadnje žada, zo so kóždemu wot staršich na serbskej šuli přizjewjenemu dźěsću zmóžni, do tuteje šule chodźić. W tutym zmysle žada sebi Domowina wuwzaćne zarjadowanje zdruheje rjadownje w přichodnym pjatym lětniku Ralbičan wyšeje šule. Statnik k tomu: „Stejimy staršim wšudźe a na wšitkich stejnišćach poboku, hdyž potrjebu trjebaja.” Po tym wuhódnoćichu na namjet Nuka „wólby wjesnjanosty w gmejnje Radwor”. W zdźěla jara emocionalnej diskusiji kritizowachu jedni pobrachowace prawa přesadźenja woprawdźiteje dwurěčnosće, druzy widźa wulki deficit pola Serbow samych, swoje prawo nałoženja maćeršćiny praktisće wužiwać. Konsens wobsteji w rezimeju: To najwažniše je wutworjenje nowych a zdźerženje rěčnych rumow w regionach – tu je hižo dobrych konkretnych přikładow dźakowano angažowanym Serbam, na kotrež móžemy nawjazać. Zwjazkowe předsydstwo je sej přezjedne, zo ma so tute ćežišćo w přichodnym financnym ramiku załožby zakótwić.Zwjeselace běše zwjazkowemu předsydstwu rozprawa Marcusa Końcarja, delnjołužiskeho zastupowaceho jednaćela Domowiny, wo stawje přihotow na Euopeadu. Sportowcy z Delnjeje a Hornjeje Łužicy so hromadźe na wutworjenje serbskeho mustwa hotuja. Z tym změju Serbja prěni raz woprawdźe cyłołužiske mustwo na Europeadźe.