Składnostnje mjezynarodneho dnja maćeršćiny (pjatk) praji předsyda Domowiny, Dawid Statnik:„Serbja trjebaja sylniši hłós. Naša maćeršćina je husćišo za kuchinskim blidom hač na dróze słyšeć. Trjebamy wjac zjawnych rěčnych rumow. Prjedy hustodosć njepřećelnje rěkaše: „Tu so němsce rěči!” Dźensniši dźeń słyšiš husćišo tež wot ludźi, kotřiž sami serbsce njemóža: „Rjenje, zo mjez sobu serbujeće.” Tón pozitiwny trend tuchwilna kampanja sakskeho statneho knježerstwa a impulsy Braniborskeje krajneje politiki za runohódnosć serbšćiny zesylnjeja, a tohodla my jako třěšny zwjazk Serbow tute prócowanja stata wot spočatka sem podpěrujemy.W zańdźenosći je so přeco zaso Serbam nałožowanje maćeršćiny zakazało: Lětsa je 75. róčnica kónca wójny, to běše tež kónc zakaza wužiwanja serbšćiny. Zo stat dźensa serbowanje w zjawnosći samo spěchuje, je wulki historiski postup. Ale při zrealizowanju našeho prawa, ze zarjadami serbsce komunikować, klaca z rěčnymimi kmanosćemi zarjadnistwa. Tohodla wočakujemy změnu personalneje politiki, zo njeby dale připadej přewostajene było, hač na zarjedźe něchtó serbšćinu wobknježi. W kóždym wobłuku zjawneje słužby w serbskim sydlenskim rumje ma přichodnje partner być, kotryž serbsce znajmjeńša rozumi.80 procentow wšěch maćeršćinow na swěće je dołhodobnje wohroženych. Štóž nětko mnohotnosć rěčow swojeho regiona wuchowa, změje přichodnje wjac atraktiwity. Serbšćina Łužicy jónkrótnosć spožča. Tohodla je tema dnja maćeršćiny runje w dobje strukturneje změny aktualna. W Domowinje je serbšćina samozrozumliwje jednanska a prěnja wobchadna rěč. Tak wšědny dźeń po cyłej Łužicy a zwonka njeje rěčne rumy tworimy.”