Znaty serbski moler Měrćin Nowak-Njechorński je w lěće 1990 po jeho smjerći Serbam zdźědźił pjenjezy a swójski bydlenski dom z ateljejom, zo by so wšitko wužiwało na dobro Serbow.

Hač do jeje smjerće w septembru 2024 je naša čłonka Róža Pinkawina dom swěrnje hladała a sej pomoc wot Domowiny a załožby wuprosyła. Nětko dyrbja Serbja to do swójskich rukow wzać. W prěnim zetkanju z wjesnjanami Njechornja a bliskeje wokoliny su so wšitcy přitomni (wjace hač 25 ludźi) za to wuprajili, zo by dom so dyrbjał jako wotewrjeny muzej wobchować.

Wnučk knjeni Pinkawineje a zdobom čłon župneho předsydstwa Florian Kießlich (nětko hišće student w Berlinje, ale z wotpohladom, so bórze do domizny wróćić chcyć) by hłownu zamołwitosć dale chcył w horšći měć. Nimo toho ma župne předsydstwo wotpohlad, wjesnjanam pomhać při wutworjenju Spěchowanskeho towarstwa domu MNN a towarstwowe dźěło sobu podpěrać. Projekt smy tohorunja zapodali pola Budyskeje lutowarnje, zo bychmy zhromadnje z wjesnjanami 2025 zahrodku – kaž to Měrćin Nowak-Njechorński sam wopisowaše w “Paradizowej zahrodce” – wuhotowali, zo by so wonkowny napohlad polěpšił.

Dale ma so z měsćanosću Wósporka, knj. Arltom, rěčeć, zo by so zahubna nabiwanska stacija za kolesa bjezposrědnje před domom zaso zhubiła, wona skepsa wšak cyły napohlad na dom (dwělomne je, hač je něchtó wot Serbow za to dowolnosć dał).

Wězo by so najprjedy dyrbjał škódnik w domje wotstronić, dom měł so potom wobnowić a wo wužiwanju domu ma so bórze ze wšitkim Serbami, nic jenož ze župu, rěčeć.

Župne předsydstwo chce, zo dom MNN wostanje tajki kaž je, wjesnjenjo a tamniša Domowinska skupina Worcyn/ Njechorń kaž tež nastawace towarstwo staraja so wo wobhospodarjenje, potom wostanje chěža w serbskich rukach a wužiwa so jako wjesne zetkawanišćo, serbski centrum a jako wotewrjeny muzej. W domje a ateljeju maja so prawidłownje zarjadowanja wotměć.

Dale by župne předsydstwo doporučiło, zo wobnowi so dom tak, zo móže motiwator teje kónčiny tam stajne dźěłowe městno namakać  a z tym wobhospodarjenje do swójskich rukow wzać.

Znowa namołwjamy, zo maja so wšě serbske wjesne muzeje přez fachowca nawjedować a přez Serbski muzej Budyšin přewodźeć.

W mjenje župneho předsydstwa župy “Jan Arnošt Smoler” Budyšin

Leńka Thomasowa, županka