Serbska tworjaca wuměłča Iris Brankačkowa njemóžeše so dodźiwać: Wona běše drje serbskorěčne knihi, na kotrychž sobuskutkowaše, hižo w lěće 2018 VG Bild-Kunst přizjewiła, ale njebuchu wobkedźbowane. VG Bild-Kunst je runja VG Wort towaršnosć za zaručenje narokow na zakładźe awtorskeho prawa. Tak je wona wosebje swobodnym wuměłcam a publicistam wažny stołp wšědneje eksistency. Tola w padźe serbskeje wuměłče VG Bild-Kunst jenož ničo njepłaćeše, ale lětsa samo jeje přizjewjenje knihow wotpokazaše, dokelž to za „knihi w hinašej rěči” hižo móžno njeje.Po rozmołwje z Domowinu je Iris Brankačkowa w lisće VG Bild-Kunst na prawa awtochtonych wobydlerjow Němskeje kaž Serbow pokazała a jich wo wulkim wuběrje serbskich knihow informowała. Na to jej so jednaćelski předsyda VG Bild-Kunst, dr. Urban Pappi, dźakowaše, „zo sće nas na zmylk w našim rozdźělenskim planje skedźbniła.” Woni budu to poprawjeć a pruwować, kak woni w jednotliwym padźe spěšnje a njekomplikowanje rozrisanje namakaja: „Wy maće absolutnje prawje!” Krótko po tym Pappi pisaše, zo wotnětka kriterij „němska rěč” tež rěče w Němskej připóznatych mjeńšin zapřija.Marko Kowar, jednaćel Domowiny, so wo wuslědku sobu wjeseli: „Ja jara witam, zo je Iris Brankačkowa tón wuspěch tež w mjenje wšěch serbskich tworjacych wuměłcow, filmowcow, fotografow a němskich wuměłcow, kotřiž serbske knihi ilustruja, docpěła. Přeco zaso so tajke běrokratiske zadźěwki našim zakładnym prawam jewja. Tola tež tón raz smy zwěsćili: Z krutym rjapom wustupujo husto dosć dobru wolu žněješ. Tak njech je tón přikład tež wšěm z pohonom, so w tajkich padach wottrašeć njedać!”