Tydźenja pjatk je zwjazkowy sejm nowy zakoń schwalił, kotryž zmóžnja prawo swójbne mjena w hamtskich dokumentach přiměrić. Wosebje za tři narodne mjeńšiny w Němskej, Frizow, dansku mjeńšinu a Serbow je to wuspěch.

Z podpěru hornjoserbskeje a delnjoserbskeje rěčneje komisije, kaž tež z juristom dr. Detlevom Reinom, kiž je hižo w lěće 2015 wudał posudk “Zum Anspruch der Sorbinnen auf weibliche Formen des Nachnamens” je so Domowina aktiwnje za změnu mjenoweho prawa zasadźowała. Za dobru kooperaciju a intensiwne zhromadne dźěło so jednaćelka Judit Šołćina partneram wutrobnje dźakuje.

“Naše serbske mjena su dźěl našeje serbskeje identity. Nadźijamy so, zo wužiwaja Serbja a Serbowki w přichodźe móžnosć, kiž nam tutón zakoń skići. Hdyž wužiwamy samozrozumliwje a sebjewědomje naše serbske mjena wšudźe a přeco, polěpšimy z tym widźomnosć delnjo- a hornjoserbšćiny kaž tež slepjanšćiny w zjawnosći.”, tak jednaćelka Judit Šołćina, kotraž budźe jeje mjeno klětu, z płaćiwosću zakonja, změnić.

Zakoń nabudźe klětu 01.05. swoju płaćiwosć.

+++

Für eine Übersetzung ins Deutsche bitte die sotra.app benutzen.

Weiterführende Informationen entnehmen Sie bitte der Pressemitteilung des Minderheitensekretariates.