Srjodu, 3. nowembra 2021, stej woglědałej pśedsedaŕ Domowiny Dawid Statnik a zastupny pśedsedaŕ z Dolneje Łužycy dr. Hartmut S. Leipner k zastojnstwje wokrejsa Sprjewja–Nysa w Baršću. W pśijaznem rozgronje stej informěrowałej krajny raźc Harald Altekrüger a zagronita za serbske nastupnosći Kerstin Kosakowa wó šulskich planowanjach wokrejsa a wó wuwijanju kólasoweje tury „Serbske impresije".

Pó tej rozgronje stej se pśedsedarja Domowiny wobźělijotej na pósejźenju Serbskego wuběrka wokrejsnego sejma. Dawid Statnik jo pśedstajił z prezentaciju struktury a zaměry Domowiny ako kšywowy zwězk Serbow a eksistěrujuce politiske ramikowe wobstojnosći. Pótom jo měł kněz H. Wilem-Keł móžnosć pśedstajiś zjadnośeństwo „Serbski sejm” a swóje pozicije. Pó prezentacijoma su měli cłonki wuběrka móžnosć na dopšašanje.

Statnik: „Wuběrk za serbske nastupnosći wokrjesa Sprjewja-Nysa njejo źěłowa kupka, ale połnogódny wuběrk – wjelikny pśikład wšym drugim wokrejsam we Łužycy!”

Foto: Kerstin Kosakowa, Harald Altekrüger, Dawid Statnik, dr. Hartmut S. Leipner (w.l.)