Torsten Ruban-Zeh (SPD), Wojerowski wyši měsćanosta, je zastupjerjow Domowiny na rozmołwu wo temje přeprosył, kak by město naležnosće serbskeho ludu najlěpje do swojich projektow w zwisku ze změnu strukturow zapřijeć móhło. Na wuměnje w radnicy srjedu popołdnu su so předsyda Domowiny, Dawid Statnik, referent třěšneho zwjazka za hospodarske a infrastrukturelne naležnosće, Pětr Brězan, a regionalna rěčnica za teritorij župy „Handrij Zejler” Wojerecy, Sonja Hrjehorjowa, wobdźělili.

Wyši měšćanosta Ruban-Zeh Domowinje slubi, při wšěch předewzaćach konsekwentnje němsko-serbsku dwurěčnosć nałožować. Zdobom wón zajim města pokaza, w zwisku z přetwarom Łužiskeje hale wjac serbskich poskitkow w kulturnym programje prezentować.

W měsće je krótko- a srjedźodobnje dosć přihódnych a centralnych kapacitow rumnosćow za nowe serbske dźěłowe městna, praješe Ruban-Zeh. Přezjednaj běštaj sej wón a Domowina, zo maja Wojerecy přichodnje wažnišu rólu za serbske institucije a kulturne serbske žiwjenje we Łužicy hrać. Nawjazujo na rozmołwu chcedźa dalše konkretne projekty rozjimać.

Wobraz: Wojerowski wyši měšćanosta Torsten Ruban-Zeh w rozmołwje z Dawidom Statnikom, Pětrom Brězanom a Sonju Hrjehorjowej ze stron Domowiny (w.l.). Foto: Domowina/Marcel Brauman