Na wuradźowanju regionalnych rěčnicow a referentow Domowiny srjedu je regionalna rěčnica župy „Jakub Lorenc-Zalěski” ze Slepoho, Diana Maticowa, wo wjacorych prócowanjach župy za wožiwjenje serbšćiny w dźěćinje a za kubłarki rozprawjała. Na měsačnym posedźenju, kotrež je so zaso digitalnje wotměło, steji přeco rozprawa wo połoženju na teritoriju jedneje župy na spočatku dnjoweho porjada. Marko Kowar, jednaćel Domowiny, je tež na zamołwitosć přistajenych třěšneho zwjazka skedźbnił, kóždu składnosć wšědneje komunikacije za tworjenje rěčnych rumow wužiwać.

Wo serbskim swjedźenju, kotryž su jako alternatiwu za pandemije dla wotprajeny mjezynarodny folklorny festiwal planowali, chcedźa hakle kónc junija doskónčnje rozsudźić, hdyž budźe jasne, kotre postajenja płaća. Referent Domowiny, Pětr Brězan, informowaše, zo maja so kulturne ćělesa ze wšěch regionow Łužicy zapřijeć. Přiwšěm pak so swjedźeń jenož wotměje, jeli njebudźe hižo tajkich wobmjezowanjow kaž wotstawk, nahubnik a zakaz alkohola.

Woni su dale hłownu a wólbnu zhromadźiznu w Slepom dnja 12. junija organizatorisce přihotowali.