56 šulerkow a šulerjow Serbskeho gymnazija w Budyšinje je lětsa maturu wuspěšnje złožiło. Katharina Jurkowa, předsydka Serbskeho šulskeho towarstwa (SŠT), je 13 maturantam sobotu w Chrósćicach składnostnje swjatočnosće zrěčenje z krajnym zarjadom za šulu a kubłanje (LaSuB) přepodała: Woni so na studij wučerstwa podadźa, swobodny stat Sakska jim dźěłowe městno na serbskej šuli zaruča.

Wo tym informuje Katrin Suchec-Dźisławkowa, kubłanska referentka Domowiny, a doda: „23 procentow maturantow serbskeho gymnazija w Sakskej je so za studij wučerstwa rozsudźiło – po cyłej Němskej je na spočatku studija 8 procentow studowacych na powołanje wučerki/wučerja wusměrjenych. Zo je w Serbach někak tři króć telko zajima za wučerstwo, pokazuje na wulki wuznam kubłanja za zdźerženje maćeršćiny serbskeho ludu. Zdobom je to wuspěch stajneho wabjenja wosebje ze stron SŠT a druhich partnerow. Tež kultusowe ministerstwo je swojej zamołwitosći wotpowědowało a serbskemu dorostej jasne signale za přichod w Serbach wusyłało.”

Katharina Jurkowa, předsydka Serbskeho šulskeho towarstwa, so wupraja: „Sym tež maturantow, kotřiž hišće rozsud wo směrje swojeho studija tworili njejsu, prosyła, sej přemyslować, hač njeby wučerstwo za nich ze zajimawej perspektiwu było. A rjenje by wězo było, hdyž bychu wšitcy, kotřiž lětsa studij wučerstwa započinaja, jón zdokonjeli a jako wučerki/wučerjo dźěłali.”