Zwjazkowe předsydstwo je pjatk, 12.4.2024, w Delnjoserbskim internaće w Choćebuzu wuradźowało. Z tym wostanje swojemu jednanskemu porjadej swěrne a pućuje po župnych teritorijach. Minjene wuradźowanje bě w Budyšinje a do toho wuradźowachu we Wojerecach.

Z Dolomitow při wobrazowce přišaltowana bě dr. Sara Mičkec, kotraž je doktorske dźěło wo rěčnej praksy w interlingualnych serbsko-němskich swójbach w Hornjej Łužicy pisała. Wona přednošowaše wo swojich biografiskich slědźenjach w serbsko-němskich swójbach. Jeje wuwjedźenja zbudźichu pola přitomnych wulki zajim a mnoho prašenjow. Kotru rólu hrajetaj wowka a dźěd při komunikaciji? Kotru rólu hraje poprawom cyrkwinske žiwjenje za serbske kubłanje? Kohož zajimuja wotmołwy na tute prašenja, móže sej widejo livestreama na našim youtube-kanalu wobhladać.

Prěni lětnik projekta Zorja steji we finalnej fazy. Po wosom měsacach su mjezystaw swojeho projekta předstajili. Nawoda Maksimilian Hasacki rozłožowaše wšelake stacije projekta. Wučba pisanja a čitanja stajnje přiběra a na wšelakich ekskursijach su Zorjaki mnoho zeznali a so w delnjoserbšćinje dale wukmanili. Hasacki hlada pozitiwnje do přichoda. “Nětko smy nimale dospołnu imersiju docpěli.” Wuspěch pokaza so w tym, zo - kaž wón trochuje - 80% wobdźělnikow w “Dešnjanskim hnězdźe” delnjoserbšćinu nałožuje. Lětsa w septembrje pokročuje Zorja z 2. lětnikom.

Rozsudy zwjazkoweho předsydstwa

Nowy zastupjer Delnjeje Łužicy w Mjeńšinowej radźe Němskeje hač do kónca tuchwilneje doby 2025 budźe dr. Hartmut Leipner. Wón je naslědnik Kita Ele, kotryž je zastojnstwo dotal wukonjał. Zwjazkowe předsydstwo so jemu za jeho swěrne dźěło, kotrež je mnoho lět wukonjał, wutrobnje dźakuje.

Dźensa móžemy potajnstwo wokoło noweho wuběrka za přihot přichodneho Mjezynarodneho folklorneho festiwala “Łužyca – Łužica” wotkrywać: Gabriel Krawc, Błažij Handrik, Marko Kliman, Katharina Jurkowa kaž tež Pětr Brězan změja wot nětka zamołwitosć za planowanje a organizaciju. Festiwal je najwjetši projekt Domowiny, na kotrymž dźěłaja čestnohamtscy a hłownohamtscy zhromadnje.

Dale powołachu čłonki a čłonojo zwjazkoweho předsydstwa sydom wosobow do wólbneho wuběrka za wólby Rady nastupnosći Serbow při Krajnym sejmje Bramborskeje na dobu 2024-2029. Su to dr. Renate Harcke, Bernd Jurk, Fred Kaiser, Kerstin Kosakowa, dr. Hartmut Leipner, Margit Neugebauer a Rainer Vogel.

Livestream posedźenjow zwjazkoweho předsydstwa budźe wot nětka měsac online. Z časa korony běchu tute na lěto přistupne. Ličby pokazaja, zo je zajim na livestreamje najwjetši krótko po posedźenjach. Zajimcy maja dale móžnosć, so na posedźenjach wobdźěleć. Tež protokole posedźenjow su na webstronje zjawnje přistupne.