Zwjazkowe předsydstwo Domowiny (ZP) je na swojim posedźenju dnja 12.05.2023 w Budyšinje schwaliło namołwu k zapodaću kandidatnych namjetow za wuzwolenje 4. serbskeho naměstnika do Załožboweje rady. Namjety hodźa so hač do 31. julija 2023 w zarjedźe Domowiny zapodać. Namołwa wusměri so předewšěm na serbske zjednoćenstwa, při čimž smědźa so tež jednotliwcy požadać. Wólbny porjad chcedźa na posedźenju 30. junija wobjednawać, wólby 22. septembra přewjesć.

Předsyda rysowaše na posedźenju proces pruwowanja wólbow do Załožboweje rady. Rjadni čłonojo Załožboweje rady su so wotpowědnje wólbnemu porjadej a wustawkam Domowiny wolili. Wólby štyrjoch rjadnych kaž tež třoch zastupowacych čłonow su płaćiwe. Kóždy čłon je wjace hač połojcu wšitkich móžnych hłosow dóstał. Prawnisce dohladowacy zarjad (SMWK) Załožby za serbski lud je w lisće z dnja 6. měrca 2023 doporučił, štwórte městno zastupowaceho čłona Sakskeje pomjenować. Zdobom je zwěsćił, zo móže přechodnje jedyn z třoch zastupjerjow dweju rjadneju čłonow zastupować.  

Budyšanka Božena Šimanec naslěduje wot 15. meje 2023 městno nowinskeje rěčnicy Domowiny. W njezjawnym dźělu su čłonojo ZP personaliju wobzamknyli a tuž je wot lońšeho nowembra wakantne městno znowa wobsadźene. Božena Šimanec je hospodarske wědomosće w Jenje a Kamjenicy studowała a ma wjacelětne powołanske nazhonjenja na polu nowinarskeho a zjawnostneho dźěła. Tute zběraše 37-lětna mj. dr. na polu kulturelneho kubłanja pola města Kamjenicy. Po nawróće do Łužicy 2020 dźěłaše naposledk w redakciji Serbskich Nowin jako redaktorka za wobłuk crossmedia. Nowa sobudźěłaćerka steji zastupjerkam a zastupjerjam medijow za informacije wo dźěławosći Domowiny po boku.

Dale powołachu čłonojo ZP we wothłosowanju ze Serbskim Sokołom z. t. Milana Funku a Pawlu Simulic jako dalšeju zwólniweju do přihotowanskeho wuběrka “Serbske mustwo – Europeada 2024”.

Křesćana Korjeńka powoła Zwjazkowe předsydstwo Domowiny do wuběrka za nutřkownu demokratiju a serbsku ciwilnu towaršnosć.

Za wabjenje dorosta přestaji M. Hančik namjet wuběrka za nutřkownu demokratiju a serbsku ciwilnu towaršnosć, kiž je wo móžnosćach wuradźował, w přichodźe dorost za serbske institucije nawabić.

Nadawk tutoho t. mj. headhuntera njeje jenož nowe dźěłowe mocy přiwabić, ale tež w zjawnosći tute dźěła šěrić, konkretnje za sobudźěłaćerjemi pytać a je po nawabjenju podpěrać. Namjet poda so nětko wjednikam serbskich institucijow z próstwu so z předłohu zaběrać.

W dalšim dypku předstaji direktor Załožby za serbski lud, Jan Budar, najnowši staw wokoło Lawskeho areala. Rysowaše tuchwilne wobstejnosće biblioteki a archiwa w Serbskim instituće, kiž je wot 2015/16 přez 20 přidatnych městnow ze srědkow třećich personelnje rozrostł. Dale maja so twarske barjery doma wotstronić a dom zjawnje spřistupnić. Serbski muzej ma w dotalnym domicilu krute postajenja pomnikoškita a je ćežko přistupny za wopytowarjow a za transporty. Pomnikoškit wobmjezuje móžnosće wabjenja na wonkownej fasadźe. W lawskim arealu hodźa so zhromadne poskitki plesć za wědu a kubłanje k serbskej rěči, stawiznam a kulturje, kaž tež za zhromadny digitalny management zběrkow. Architekturne wubědźowanje je wunjesło, zo su 18 wotedatych naćiskow hač do apryla tutoho lěta dóšli. W juniju budźe jury wo naćiskach rozsudźić.

Doporučenja kulturneho wuběrka Domowiny na Załožbowu radu při naćisnjenju twarskeje koncepcije Serbskeho foruma wědy je Załožba za serbski lud pruwowała a přidatne rumnostne potrjeby so z toho njejsu zwěsćili. Doporučenja ma twarski wuběrk Załožby na wědomju.

Přizamknje so dalše planowanje, tež próstwa wo spěchowanje ma so přizwolić. Potom móže so twarska próstwa zapodać, kiž město Budyšin pruwuje. Po tym startuje konkretne planowanje, kotre firmy kotre dźěła wukonjeja. Twarić chcedźa w dwěmaj fazomaj a 2027 ma prěnja faza z běrowami a archiwom dokónčena być. Točenja a přepytowanja pódy su planowane za lětuše druhe połlěto. Kooperacija wobsteji z Wyšej šulu Žitawa/Zhorjlc za naslědny energijowy koncept. Eksterny běrow ma planowanja a twarske dźěła na starosći.

Programowa diskusija Domowiny zahaji so 9.6.2023 w 17.00 hodź. we Wojerecach. Wšitcy zajimowani su wutrobnje přeprošeni.