Na nowym městnje a na njezwučene wašnje zahaji so 12. rjadne posedźenje Zwjazkoweho předsydstwa Domowiny dnja 17. meje we wopytowarskim centrumje Parka błudźenkow we Wochozach. Tam witaše předsyda jeho spěchowanskeho towarstwa Ulrich Klinkert přitomnych. Skutkowanje parka błudźenkow hódnoćeše jako jara dobre. Tak wopytowaše w 17 lětach wobstaća wjac hač 1,5 mio. wopytowarjow jónkrótny park. Dale pokaza na planowane projekty přichoda. Mjez druhim chce so prócować wo projekty ze serbskimi šulemi. Tak móhła so na přikład přewjesć šula w zelenym. K zahajenju posedźenja spominaše zwjazkowe předsydstwo na wotbagrowane serbske wsy. Předsyda Domowiny Dawid Statnik mjez druhim praji: “Kónc wotbagrowanja wsow je wotwidźeć. Z tym spjelni so žadanje našeho programa ‚Domowina 2025’ wo dołhodobny a rjadowany wustup z wudobywanja a zmilinjenja brunicy. Miłoraz je poslednja wjes w Sakskej, kotraž ma so brunicy dla přesydlić.”Nastupajo wjeski Prožym wuprajichu so čłonojo Zwjazkoweho předsydstwa Domowiny za bórzomne wujasnjenje, kajke su plany předewzaća LEAG, zo njebychu potrjecheni wobydlerjo byli dale žiwi w njewěstosći wo swójskim přichodźe. Wuhódnoćejo 19. hłownu zhromadźiznu Domowiny diskutowachu přitomni prěnje konkluzije za druhu połojcu wólbneje doby 2017-2021. Tak podšmórny Marka Cyžowa, zastupjerka Maćicy Serbskeje w zwjazkowym předsydstwje a předsydka wuběrka za zjawnostne a lobbyjowe dźěło, trěbnosć, zo čłonojo zwjazkoweho předsydstwa z čłonami na bazy šěršo a lěpje do rozmołwy přińdu, na přikład wo namjetach, kiž buchu we wotmołwach na wotewrjene prašenja lońšeho naprašowanja podate. Wona namjetowaše wutworić dźěłowu skupinu ze zastupnikow wšitkich wuběrkow Zwjazkoweho předsydstwa Domowiny, kotraž naćisnje plan naprawow, kotryž měł so w zwjazkowym předsydstwje diskutować a wobzamknyć. Potom budźetej gremij a baza so čim wědomišo zbližić. Wuhódnoćenje kubłanskeje klawsury w Delnjej Łužicy z dnja 10.04.2019 a dalše postupowanje w zwisku z WITAJ-ewaluaciju běchu dalši dypk dnjoweho porjada. Zwjazkowe předsydstwo je wjednicy Rěčneho centruma WITAJ (RCW) dało nadawk, z pomocu čłonow kubłanskeho wuběrka Domowiny naćisnyć list, kotryž adresuje so na Braniborsku ministerku za kubłanje, młodźinu a sport (MBJS) a wobjima zakładnu poziciju Domowiny k WITAJ-ewaluaciji. Dale ma RCW w dorozumjenju z prezidijom Domowiny dalše kročele diskusije wo WITAJ-ewaluaciji namjetować a přesadźenje podpěrować. Zwjazkowe předsydstwo wobzamkny namołwu, zo bychu so namjety za nominowanje štyrjoch kandidatow za lětuše wólby do Rady za serbske naležnosće Swobodneho stata Sakska na dobu 2019-2024 a naprašnik za kandidatow zapodali. Hač do 15.08.2019 móža župy, sobustawske towarstwa a zwjazki Domowiny kaž tež dalše serbske towarstwa a zwjazki w Sakskej namjety na Domowinu zapodać. Prezidij ma z pomocu zarjada Domowiny wšitke dalše trěbne kroki za tute nominowanje koordinować. Radu za serbske naležnosće w Sakskej, kotrejž tež jedyn zastupjer komunow přisłuša, woli krajny sejm.Za naćisk hospodarskeho plana za lěto 2020 namołwi zwjazkowe předsydstwo čłonske towarstwa a župy Domowiny, hač do 03.06.2019 zapodać zarjadej Domowiny w Budyšinje financielnu a personelnu potrjebu za zwoprawdźenje swojich předewzaćow na zakładźe wot 19. hłowneje zhromadźizny wobzamknjenych dźěłowych směrnicow. Prezidij zwjazkoweho předsydstwa dósta nadawk, nastajenja plana we wothłosowanju z jednaćelom a nawodnicu Rěčneho centruma WITAJ kontrolować.Zwjazkowe předsydstwo Domowiny je wobzamknyło zestawu dźěłoweje skupiny EUROPEADA 2020. Wona wobsteji z 10 wosobow – 5 z Hornjeje a 5 z Delnjeje Łužicy (kaž tež 4 dalši zastupjerjo). Hišće w juniju ma so dźěłowa skupina konstituować a trěbne přihoty zahajić. Čłonojo skupiny su:

• Hornja Łužica: Clemens Škoda, Bjarnat Delenk, Pětr Bejmak, Frank Ričl, Franziska Helnerowa, André Strelow (zastupowacy) a Handrij Rachela (zastupowacy)
• Delnja Łužica: Marcus Końcaŕ, Horst Krawcyk, Frank-Norbert Sieg, Felix Šwjela, Fred Kaiser, Willi Paška (zastupowacy) a Paula Simulic (zastupowaca).

Nastupajo zjednoćenstwa “Serbski sejm” přihłosowachu čłonojo Zwjazkoweho předsydstwa namjetej předsydy Domowiny, zastupjerjow na dźěłowu rozmołwu přeprosyć. Rozmołwa ma słužić mjezsobnej wuměnje pozicijow.