Wotmołwy na wotewrjene prašenja lońšeho naprašowanja wšěch serbskich towarstwow a zwjazkow su z pomocu zarjada Domowiny přehladane a prěnje konkluzije jasne. To zwěsćichu čłonojo rozšěrjeneho wuběrka za zjawnostne a lobbyjowe dźěło Domowiny na swojim posedźenju w tutym tydźenju w Budyšinje. “Dźěło z tym dawno njeje wotzamknjene, ale smy prěnje nadawki z wuslědkow naprašowanja wotwodźeli”, praji předsydka wuběrka Marka Cyžowa.Wuběrk zwěsći w swojej analyzy, zo přeja sej wobdźělnicy naprašowanja najhusćišo wjace kontakta, zwiskow a transparency Domowiny. Zwjazkowe předsydstwo wotměwa swoje něhdźe dwuměsačne posedźenja stajnje na teritoriju druheje župy. Wuběrk namjetuje nětko zwjazkowemu předsydstwu, zo přeproša sej předsydow Domowinskich skupin a towarstwow, kiž we wotpowědnej župje skutkuja, wosobinsce na swoje posedźenje. “Z tym poskićił by so časćiši, prawidłowny a njeposrědny kontakt. Informacije, měnjenja a nazhonjenja, runje tak kaž wjesela a starosće, hodźa so tak na krótkim puću wuměnjeć”, měni Marka Cyžowa. Přichodne posedźenje zwjazkoweho předsydstwa budźe dnja 6. septembra w Budyšinje. Tam chce wuběrk swój namjet předstajić a schwalić dać.