Přihoty 19. hłowneje zhromadźizny Domowiny běchu jedna z temow zetkanja prezidija Domowiny dnja 12.09.2018 we Wojerecach.

Tež zaběrachu so čłonojo ze stejišćom Domowiny k pjatej rozprawje Němskeje wo zwoprawdźenju ramikoweho dojednanja ke škitej narodnych mjeńšin. Jedna so při tym wo jedne z dweju centralneju europskeju rjadowanjow nastupajo politiske a wobsahowe połoženje Serbskeho ludu.

Dale wobjednachu naćisk porjada za wólby serbskich zastupjerjow ze Sakskeje za załožbowu radu na dobu 2019-2023 a powołanje wólbneho wuběrka. Rozsudźić wo tym ma Zwjazkowe předsydstwo na swojim přichodnym posedźenju. Wólby přewjedu so 14.12.2018.

Prezidij přeprosy wšitkich zajimcow na konferencu k strukturnemu wuwiću we Łužicy. Konferenca wotměje so dnja 13. a 14. septembra na Braniborskej techniskej uniwersiće (BTU) w Złym Komorowje/Senftenberg, Uniwersitne naměsto 1. Wona je zjawna a zastup darmotny. Cyłkowny program je wozjewjeny pod www.domowina.de.

Konferencu k strukturnemu wuwiću we Łužicy organizujetej zhromadnje Dźěłarnička přichod Łužicy w nošerstwje wokrjesa Zhorjelc a Domowina – Zwjazk Łužiskich Serbow.

Předsyda Domowiny Dawid Statnik k tym: “Konferenca je móžnosć naš přichod aktiwnje wowliwować. Strukturna změna njeje jenož strašny scenarij ale tež šansa, serbskosć jako zwjazowacy element Łužicy skrućić. Widźimy so tuž w Złym Komorowje!” 

Přichodne posedźenje Zwjazkoweho předsydstwa Domowiny wotměwa so 19.10.2018 w Choćebuzu.

Přichodne posedźenje prezidija Domowiny wotměwa so 15.08.2018 we Wojerecach.