Přihoty přichodneho posedźenja Zwjazkoweho předsydstwa stejachu w srjedźišću posedźenja prezidija Domowiny dnja 19.11.2019 we Wojerecach. Wosebje rozprawnistwo wo dotalnej dźěławosći a naćiski dźěłowych planow lěta 2020 so wobjednachu.Čłonojo prezidija Domowiny zaběrachu so mjez druhim z lětnymaj rozprawomaj zarjada Domowiny a Rěčneho centruma WITAJ za lěto 2019 kaž tež z naćiskomaj dźěłowych ćežišćow za lěto 2020. Předsyda Domowiny Dawid Statnik hódnoći bilancu dźěławosće pozitiwnje. Doskónčnje zaběrać ma so z tutymi zwjazkowe předsydstwo na swojim přichodnym posedźenju.Zdobom wobjedna prezidij naćisk hospodarskeho plana Domowiny a Rěčneho centruma WITAJ, kotryž bu wot załožboweje rady wopodstatnjeny. Wón je zakład za wšelke projekty lěta 2020.Tak chce Rěčny centrum dale rozšěrić poskitk certifikatow rěčnych znajomosćow hornjo- a delnjoserbšćiny. Zarjad Domowiny dale zamołwi wobdźělenje serbskeho mustwa na Europeadźe 2020.Pozitiwnje wuprajichu so čłonojo gremija nad powěsću předsydy Domowiny, zo je třěšny zwjazk dóstał w ramiku prěnjeho braniborskeho wubědźowanja “Serbski pśichod: Łužyca” pjenježne myto za přewjedźenje strukturneje konferency. Statnik praji k tomu: “Dźakujemy so jury za mytowanje, štož hódnoćimy tež jako připóznaće našeho dźěła. Mytowanje je dobra móžnosć, lokalne aktiwity zesylnić.” Přichodne posedźenje Zwjazkoweho předsydstwa Domowiny wotměje so 29.11.2019 w Budyšinje. Přichodne regularne posedźenje prezidija Domowiny budźe 17.12.2019 we Wojerecach.