Přihoty přichodneho posedźenja Zwjazkoweho předsydstwa Domowiny stejachu w srjedźišću posedźenja prezidija Domowiny dnja 17.01.2018 we Wojerecach. Tam maja so na přikład rozprawje zarjada Domowiny a RCW wo dźěławosći w lěće 2017 kaž tež ćežišća dźěławosće za lěto 2018 wobjednać. Dale ma so hospodarski plan za lěto 2018 schwalić.
Pod nawodom předsydy Domowiny Dawida Statnika zaběrachu so čłonojo gremija z naćiskom koncepta za konferencu k strukturnemu wuwiću Łužicy, kotruž za september přihotuja.
Dalša tema bě naćisk stejišća Domowiny we wobłuka słyšenja Krajneho sejma Schleswigsko-Holsteinskeje k iniciatiwam na polu mjeńšinowych prawow. Stronje SSW a SPD namjetowaštej rozšěrjenje prawniskich móžnosćow za dansku mjeńšinu, zo bychu přisłušni mjeńšiny před zarjadami móhli naležnosće w mjeńšinowej rěči přednjesć abo pisomnje zapodać. Hinak hač Serbam tute prawo přisłušnym druhich mjeńšin w Němskej njepřisteji.
Přichodne posedźenje prezidija budźe srjedź februara we Wojerecach. Zwjazkowe předsydstwa Domowiny schadźuje so 23.02.2018 w Choćebuzu.