Wutoru (1.2.) dopołdnja je so składnostnje narodnin Handrija Zejlerja we Łazu oficielnje „Lěto Zejlerja a Kocora” (https://domowina.blog/2021/11/30/leto-zejlerja-a-kocora-2022/) zahajiło. Na přeprošenje předsydstwa spěchowanskeho towarstwa zetkanišća „Dom Zejlerja a Smolerja” Łaz z.t. su so 1. małeho róžka (februara) při pomniku a na kěrchowje při rowje basnika serbskeho narodneho wozrodźenja a ewangelskeho fararja Handrija Zejlerja (1.2.1804-15.10.1872) zastupjerjo towarstwa, gmejny, cyrkwje a Domowiny zetkali. W přitomnosći wjesnjanosty Thomasa Leberechta a předsydy towarstwa Reinhardta Schneidera je městopředsydka Gabriele Knothowa spominanske zarjadowanje serbsce zahajiła.

Ko-župan župy „Handrij Zejler” Wojerecy, Marcel Brauman, je fararjej Christianej Huthej, „naslědnikej Handrija Zejlerja”, jako dar župy „Handrij Zejler” Wojerecy spěwarske za ewangelskich Serbow ze złotym rězkom přepodał a pjeć dalšich spěwarskich w nadawku serbskeho superintendenta Krystofa Rummela za wěriwych, kotřiž je hišće nimaja. Spěwarske je Serbski wosadny zwjazk w lěće 2010 wudał. Při tym mjenowaše ko-župan „ewangelskich Serbow stołp serbskosće regiona.” Přiwzał je pakćik ewangelski Serb Günter Wjenk, kiž je z dołholětnym angažowanym čłonom Łazowskeje cyrkwinskeje rady a spěchowanskeho towarstwa zetkanišća „Dom Zejlerja a Smolerja”. Huth je wotmołwił, zo „njeje Bóh jenož čłowjeka stworił, ale tež ludy”, a zo chce tohorunja na dobro serbskeho ludu skutkować. 

Wobraz: Při pomniku Handrija Zejlerja we Łazu – Günter Wjenk, Christian Huth, Marcel Brauman (w.p.), foto: Andreas Kirschke