Zwjazkowe předsydstwo je na swojim posedźenju njedawno w Choćebuzu namołwu k zapodaću kandidatnych namjetow za wuzwolenje serbskich zastupjerjow ze Sakskeje do załožboweje rady wozjewiło. K tomu słuša tež naprašnik za kandidatki a kandidatow. Woboje je na internetnej stronje třěšneho zwjazka přistupne: https://www.domowina.de/hsb/aktualnosce/translate-to-hsb-aufruf-zur-einreichung-von-vorschlaegen-fuer-stiftungsratswahl.

Serbske zjednoćenstwa móža namjety zapodać, tež jednotliwcy smědźa so požadać – hač do 1. nazymnika/nowembra 2022. Adresy: sekretariat@domowina.de; Domowina, Póstowe naměsto 2, 02625 Budyšin. Wólby so na posedźenju zwjazkoweho předsydstwa 25. nazymnika/nowembra wotměja.

Nadawk zastupjerjow Serbow w załožbowej radźe je, zhromadnje z druhimi Serbami a zastupjerjemi tak mjenowanych pjenjezydawarjow wo eficientnym zasadźenju dawkowych pjenjez na dobro serbskeho ludu přemyslować a rozsudźić. Při tym su ideje a nazhonjenja z najwšelakorišich wobłukow prašane. Při tutej dźěławosći dźe wo konkretne prawniske, hospodarske abo kulturnopolistiske naležnosće. Załožbowa rada ma dokładne rozdawanje srědkow wobzamkować. 

Wažne je wězo tež pěstowanje kontaktow z druhimi politisce a kulturnje zajimowanymi Serbami a zamołwitymi na komunalnej, parlamentariskej a knježerstwowej runinje. Tak dóstanješ dohlad do problemow spěchowanych institucijow a projektow a wobdźěliš so na diskusiji wo prioritach spěchowanja. Sobudźěło w załožbowej radźe je naročny a zajimawy nadawk, za kotryž dyrbiš drje prawidłownje dosć chwile nałožować, ale při tym so ći njewostudźi. (Tute wopisanje so na nazhonjenja dotalnych radźićelow złožuje.)