27.2.2024

Na swojim dźensnišim zetkanju je prezidij Domowiny stejišćo k rozšěrjenju naprawow Europskeje charty regionalnych abo mjeńšinowych rěčow wobzamknył. W tutym zasadźuje so Domowina mjez druhim za prawnisku płaćiwosć dokumentow, kotrež w mjeńšinowej rěči předleža a za přełoženje wažnych zakonjow do tuteje. Dale namjetuje Domowina nimo kubłanskich temow, žurnalistow w mjeńšinowej rěči kubłać. Dohromady namjetuje prezidij Domowiny wjace hač 30 přidatnych naprawow, kiž měli k hižo z lěta 1999 wobstejacym zawjazkam za Swobodny kraj Saksku płaćić. Specifiske naprawy za Bramborsku w ramiku Europskeje charty su so hižo loni ratifikowali. 

Dalša tema na agendźe bě lětny seminar dźěłoweje skupiny non-kin-state Federalistiskeje unije Europskich narodnych skupin (FUEN), kotryž wotměje so lětsa wot 23.-26. apryla w Lubnjowje/Błóta. Domowina je hosćićel zarjadowanja a wjeseli so zastupjerjow mjeńšin bjez maćerneho kraja k prěnjemu razej we Łužicy witać. Hłownej temje seminara budźetej změna strukturow we Łužicy a turizm jako šansa za mjeńšiny.

Prezidij je konstituowanje wólbneho wuběrka za wólby do Bramborskeje serbskeje rady za přichodne posedźenje zwjazkoweho předsydstwa dnja 12. apryla přihotował. Wšitkich zajimcow, kotřiž chcedźa we wólbnym wuběrku skutkować, prosy Domowina so hač do 18. měrca 2024  přez mailku na sekretariat@domowina.de přizjewić.