Domowina so přichodnu póndźelu popołdnju ze zjednoćenstwom „Serbski sejm” na rozmołwu w Budyskim Serbskim domje zetka. Wo tym informuje Dawid Statnik, předsyda Domowiny:„Jako bazowodemokratiski třěšny zwjazk Serbow a zakonsce připóznata zastupjerka serbskich zajimow wěmy z historiskich nazhonjenjow, zo njemóžemy sej jako serbski lud dowolić, z wjacorymi jazykami napřećo politiskej zjawonosći wustupować. Zdobom je cyle jasnje a samozrozumliwje, zo běše, je a budźe w Serbach wšelakich měnjenjow w zakładnych towaršnostnych prašenjach – runja druhim ludam. Tohodla mamy jako Domowina historisce zrosćenu winowatosć, tež nutřkownoserbske diskursy a debaty moderować.W tutym zmysle wjeselu so na wuměnu ze zastupjerjemi skupiny ,Serbskeho sejma’. Zetkanje budźe, tak smy so mjezsobu dojednali, dźěłowa rozmołwa z dźesać wobdźělnikami na kóždmy boku. Domowina je přeco wotewrjena k rozmołwam na dobro serbskeho ludu. Wšelaki wid našich čłonow we wšelakich naležnosćach słuša do normality našeho narodneho žiwjenja. So wě, zo so tež we wšěch gremijach na kóncu přeco wo konsensu prócujemy, zo bychmy z jednym hłosom sylnišo k wužitku zajimow serbskeho ludu skutkować móhli.”Wo zaćišćach abo wuslědkach tutoho zetkanja móžeće so wězo po tym pola wobdźěleneju organizacijow wobhonić.