Štwórtk nawječor so lětuše zetkanje předsydy Domowiny, Dawida Statnika, ze županami a předsydami čłonskich towarstwow třěšneho zwjazka wotmě. Wot 23 wobdźělenych běše 21 přez widejo-konferencu přitomnych. Statnik so wšěm towarstwam za jasny signal dźakowaše, zo chcedźa lětušu hłownu zhromadźiznu najebać pandemiju jako prezencne zarjadowanje přewjesć, zo bychu so ludźo wosobinsce zetkać móhli. Tohodla so „hłowna” w ćěłozwučowarni šulskeho kompleksa w Slepom 12. junija přewjedźe, zo bychu dosć městna za trěbny wotstawk měli. Hač do kónca měrca maja so wobsahi za delegatnu mapu zezběrać; zo by so serbske towaršnostne žiwjenje tež pod tuchwilnymi wuwzaćnymi wuměnjenjemi wotbłyšćowało, móža towarstwa hišće rozprawu z tekstom a wobrazami wo swojej dźěławosći na Werner.Sroka@domowina.de pósłać. Lisćinu kandidatow za organy Domowiny chcedźa tón raz ewentualnje tróšku pozdźišo wozjewić, dokelž je w zymje pandemije dla wjele hłownych zhromadźiznow towarstwow wupadnyło a maja tohodla nastajenje kandidatow nachwatać. Hartmut Leipner je na namjet Maćicy Serbskeje kandidat za městopředsydu Domowiny z Delnjeje Łužicy. Dawid Statnik připowědźi swoju kandidaturu za dalšu dobu jako předsyda, kotruž dotal hižo župje „Handrij Zejler“ Wojerecy a „Jan Arnošt Smoler” Budyšin podpěrujetej. Hladajo na dotalnu zestawu kandidatow za zwjazkowe předsydstwo apelowaše Statnik na serbske cyłki, so sobu wo to starać, „zo by so naš fungowacy ,serbski matriarchat’ tež ze sylnej prezencu žonow w načolnym gremiju třěšneho zwjazka pokazał. Mjezystaw kandidaturow tomu hišće njewotpowěduje.”Wobdźělnicy informowachu so wo stawje politiskich rozsudow nastupajo nowe financne zrěčenje za přichodny etat Załožby za serbski lud. Jednaćel Domowiny Marko Kowar skedźbni w zwisku z aktualnymi wupisanjemi na načasny fenomen, „zo nam drje srědki hižo njepobrachuja, ale ludźo za serbske dźěłowe městna.”Dalša tema běše wothłosowanje w přihotowanju Lěta župow 2021/2022 a Lěta Kocora a Zejlerja 2022. Lěto župow słuži w prěnim rjedźe mjezsobnemu zetkawanju župow. Hač budźe dotal předwidźana alternatiwa w regionalnym ramiku za wotprajeny mjezynarodny folklorny festiwal móžna, je wuwića pandemije dla dale njewěste. Jan Bělk, předsyda Zwjazka serbskich wuměłcow, na zakładźe dotalneje kooperacije z wokrjesom Dubja-Błota z přewjedźenjom serbskeho literarno-hudźbneho swjedźenja 21. awgusta w Lubinje liči. Młodźinske towarstwo Pawk, tak předsyda Jakub Wowčer, planuje hromadźe ze skupinu „Trio a kumple” pop-operu za nazymu.Pod wšelčiznami informowaše předsyda Domowiny wo změnje w Serbskim domje: Prjedawše rumnosće studija MDR móža druhe institucije a zajimcy rady wužiwać, kaž na přikład Rěčny centrum Witaj za synchronizaciju widejow; „chcemy hornju etažu z nowymi medijalnymi poskitkami pjelnić.” Wažne polo je tež prócowanje wo zaručenje poskitkow SAEK, kotrehož spěchowanje so bórze skónči, tež serbskich. Domowina podpěruje w tutym zwisku požadanje „Medijoweje syće Łužica” zwjazka poskićowarjow z cyłeje Łužicy. 23.4. chce Kukowska młodźina župje „Michał Hórnik” Kamjenc na župnej hłownej zhromadźiznje přistupić, informowaše županka Zala Cyžowa. Towarstwo Serbski kulturny turizm je wo sydom čłonow rozrostło, praješe předsyda Pětr Brězan.Z tym je bilanca dźěławosće towarstwow a župow pod třěchu Domowiny njehladajo na tuchwilne ćeže pozitiwna. Statnik: „Mam wulki respekt před čestnohamtskim dźěłom našich čłonow. Wjeselu so, zo so situaciji njepodadźa, ale zmužiće serbske žiwjenje haja. Wuslědk je nimoměry pozitiwny. To mam za wobkrućenje Domowiny jako domizna serbskeho bazodemokratiskeho hibanja a jako rěčnica za zajimy Serbow.“