Na wuradźowanju zastupjerjow serbskich institucijow štwórtk, 14.7., na žurli Serbskeho domu a digitalnje, kiž staj předsyda a jednaćelka Domowiny, Dawid Statnik a Judit Šołćina, moderěrowałoj, su nošerjo „Łužiskeho monitora” wuslědki lětušeho woprašowanja ludnosće předstajili. 16 procentow je so k serbskemu pochadej wuprajiło, tak Stefan Bischoff, jednaćel MAS Partners. To je wjac hač 150.000 wobydlerjow. Dr. Jörg Heidig, załožićel a šef „Prozesspsychologen – Institut für Organisationsentwicklung GmbH” z Kwětanec, je na to skedźbnił, zo su tući ludźo skerje ze situaciju w regionje spokojom a přichod bóle optimisce widźa. Nimale 80 procentow ludźi ze serbskim pochadom Domowinu znaje. 59 procentow cyłeje ludnosće ma serbsku kulturu za jónkrótnosć Łužicy a 49 procentow wobhladuje serbšćinu w zjawnosći jako wobohaćenje.

Po čiłej diskusiji je dr. Heidig na dźěłarničku za dalewuwiće Łužiskeho monitora přeprosył. Přichodnje móhli tež dalše serbske aspekty we „Łužiskim monitorje” rólu hrać. Judit Šołcina, jednaćelka Domowiny, a dr. Beata Brězanowa, nawodnica Rěčneho centruma Witaj, přeještej sej na dotalne wuslědki nawjazujo přichodne pohłubšenje dopóznaćow wo potencialu Serbstwa za Łužicu. Direktorka Budyskeho Serbskeho muzeja, Christina Boguszowa, ma za trěbne, zo sej serbske institucije swoje zaměrowe skupiny wuwědomjeja, kotrež přesahuja znate serbske kruhi. Bogna Korjeńkowa, nawodnica Budyskeho studija MDR, je hladajo na wulku ličbiu ludźi ze serbskim pochadom zamołwitosć Sakskeje a Braniborskeje wuzběhnyła, tutej towaršnostnej realiće wotpowědować. 

Kubłanska referentka Domowiny Katrin Suchec-Dźisławkowa je wo powołanskich wikach na Ralbičanskej šuli 13.10.2022 informowała, na kotrychž móža serbske institucije hromadźe za swoje poskitki dźěławosće wabić. Klětu chcedźa po mjezsobnym wothłosowanju sami „Dźeń serbskich institucijow – dźěłowe městno w serbskej instituciji“ wotměć. Zastupowaca direktorka Załožby za serbski lud, Michaela Mošowa, je wšě institucije namołwiła, w ramiku hospodarskeho planowanja přidatne wukubłanske městna wutworić.