Cyłkownje 220 šulerjow zakładnych šulow Ralbicy, Pančicy, Chrósćicy, Worklecy, Budyšin, Radwor, Wojerecy, Kulow a Slepo so tuchwilu na projektnych dnjach „zetkanje ze Zejlerjom a Kocorom” wobdźěla. Zhromadny projekt župow Hornjeje Łužicy a Rěčneho centruma Witaj w nošerstwje Domowiny so wot wutory, 5. pražnika, hač do pjatka, 8. pražnika, w domje a na zahrodźe Domowiny we Wojerecach přewjeduje.  Projektne dny su wobstatk „Lěta Zejlerja a Kocora”*, kiž na 150. posmjertniny basnika Handrija Zejlerja a 200. narodniny komponista Korle Awgusta Kocora spomina.

Kaž hižo po jutrach na samsnym městnje šulerjam wosmeho lětnika z cyłeje Hornjeje Łužicy** poskićuja nětko dźěćom štwórteho lětnika wšelake stacije. Na jednej dźe wo fabule (zamołwita: regionalna rěčnica Sonja Hrjehorjowa), na druhej wo rjemjesło, kotrež ma Brětnjanske rejowanske a drastowe towarstwo na starosći. Na třećej staciji Michaela Hrjehorjowa a Marlis Konjechtec wo žiwjenju Zejlerja a Kocora powědatej a na štwórtej Beata Nasticyna spěw a hudźbu sposrědkuje.

Tak móža tež młódši šulerjo Zejlerja a Kocora derje zeznać. Na stacijach dźěłaja w měšanych skupinach, zo bychu so šulerjo tež mjez sobu lěpje zeznajomić móhli. Wutoru su šulerjo z Pančic, Chrósćic a Budyšina pobyli, srjedu z Ralbic a Worklec, štwórtk wočakuja dźěći z Radworja a Wojerec a pjatk z Kulowa a Slepoho. Wo tym informuje regionalna rěčnica Katharina Jurkowa. Naposledku hišće wažny fakt: K wobjedu syda pizza.

Foto: Christiana Dinarjec-Kubańkowa

*https://www.domowina.de/fileadmin/Assets/Domowina/Mediathek/Material_Domowina_NEWS_Anlagen/2022_Leto_Zejlerja_a_Kocora.pdf

**https://www.domowina.de/hsb/medijowy-wobluk/blog/220-sulerjow-z-cyleje-hornjeje-luzicy-na-zetkanju-ze-zejlerjom-a-kocorom-1917