Njedawno zetkachu so zastupjerjo Domowiny z wjednistwom Biosferoweho rezerwata Hornjołužiska hola a haty na dźěłowu rozmołwu w Stróži. Wosebje w srjedźišću stejachu serbskorěčne poskitki rezerwata. Tak budu ponowjene tafle přirodoweje šćežki Hućinjanskich hatow dwurěčnje popisane. Dalši dypk bě zawjazanje šulskeho muzeja „Korla Awgust Kocor” w Stróži do poskitkow biosferoweho rezerwata, nawjazujo na rozmowłu w tamnišim muzeju w meji ze zastupjerjemi gmejny Malešecy, towarstwa Radiška, Załožby za serbski lud a Domowiny.

Nastać ma w kooperaciji modul wobswětoweho kubłanja, kiž zwjaza serbsku rěč a wobsahi šulskeho muzeja z wodźenjemi po biosferowym rezerwaće. Dale móhli na přikład serbscy skawća lěhwo w kónčinje hole a hotow přewjesć. Tež wodźenja po přirodźe móhli so w serbšćinje wotměwać, namaka-li so Serb abo Serbowka, kiž by hosći wjedła. Film wo biosferowym rezerwaće, kiž zawjedźe do wustajeńcy w Domje tysac hatow, je so do serbšćiny synchronizował.

Na rozmołwje wobdźělichu so (hlej foto w.l.):

Dawid Statnik, předsyda Domowiny; Jana Pětrowa, čłonka předsydstwa towarstwa Radiška (su tež čłon Budyskeje župy „Jan Arnošt Smoler”); Katja Liznarjec, regionalna rěčnica za teritorij župy „Jan Arnošt Smoler” Budyšin; Susanne Bärisch, zamołwita za zjawnostne dźěło w zarjadnistwje biosferoweho rezerwata; Torsten Roch, nawoda zarjadnistwa biosferoweho rezerwata Hornjołužiska hola a haty. Foto: Domowina