Pjatk, 18.3., w 14 hodź. so zahaji na přeprošenje wuběrka zwjazkoweho předsydstwa Domowiny za naležnosće změny strukturow, hospodarstwo a infrastrukturu „strategiske wothłosowanje mjez serbskimi institucijemi k ramikowym wuměnjenjam spěchowanja strukturneje změny”. Zajimcy móža prěnju hodźinu na internetnej stronje Domowiny livestream wuradźowanja sćěhować, doniž so dźěłarnički njepřizamknu.

Po spočatk měrca wobzamknjenych směrnicach Załožby za serbski lud k spěchowanskemu programej „Serbska rěč a kultura w času strukturneje změny” maja so prěnje próstwy hač do 31. měrca zapodać. 2020 wobzamkny Zwjazkowy sejm w Zakonju za zesylnjenje strukturow brunicowych regionow, zo steja srědki w tutym zwisku tež za serbske naležnosće k dispoziciji. Za Łužiski rewěr w Sakskej je to hač do 2038 lětnje 2,5 mio. eurow, kotrež ma Załožba za serbski lud wobhospodarjeć. W Braniborskej su so hižo za wšo dohromady 19 milionow eurow w času hač do 2031 na šěsć wulkoprojektow dojednali.

Pětr Brězan,  referent Domowiny za hospodarske a infrastrukturelne naležnosće, so k tomu wupraja: „W srjedźišću naprawow na dobro Serbstwa w ramiku změny strukturow steja wozrodźenje regionalnych rěčnych rumow a skrućenje kulturneje identity regionow. Chcemy z institucijemi wuradźować, kak móhli wone w tutym procesu ze swojimi kompetencami a resursami serbskej bazy w regionach poboku być.”