Drugi kurs rěcnego projekta Zorja něnto južo tśi mjasece dłujko běžy. W toś tom casu njejsu se wobźělniki jano mjazy sobu zeznali, ale južo wjele nawuknuli a teke južo imersiski tyźeń pśewjadli.

„Prědny wjerašk jo źinsajšna ekskursija do Budyšyna. How zeznawaju kursistki a kursisty naraz někotare stacije serbskego žywjenja.”, tak nawjedowaŕ Maximilian Hasacki. 11 wobźělnicow a wobźělnikow su se zgromadnje z docentoma Gregorom Wieczorekom a Maximilianom Hasackim do Budyšyna wudali.

Pśedsedaŕ Domowiny Dawid Statnik wita pśibytnych w Serbskem domje. Wón jo rozkładł jim źěłabnosć kšywowego zwězka a jeje župow, Domowinskich kupkow a towaristwow. Kubłańska referentka Katrin Suchec-Dźisławkowa jo aktualnu kubłańsku situaciju w Sakskej pśedstajiła. Ekskursija wjeźo dalej do Serbskeje kulturneje informacije, Smolerjec knigłaŕnje, serbskego gósćeńca Wjelbika a naslědku do Serbskego muzeja.

“Teke w našom rěcnem gnězdźe su gósći zasej lubje witane, kótarež kśě nas zeznaś abo wěcej wó projekśe zgóniś ”, tak Hasaki. Tyca daś se pla Maksimiliana Hasackego (kontakt@zorja.org) pśizjawja.

Chtož ma nimo togo zajm, sam wobźělnica abo wobźělnik byś, móžo se něnto južo za Zorja-lětnik 2025 / 2026 pśizjawiś, kóńc za zapódaśe procowanja jo 23. februara 2025.

Foto: Domowina/Božena Šimanec