Srjedu zetkachu so w Stróži w šulskim muzeju zastupjerjo Domowiny – předsyda Dawid Statnik, Jana Pětrowa, čłonka župneho předsydstwa a towarstwa Radiška, nošerja muzeja, a regionalna rěčnica Katja Liznarjec – a Załožby za serbski lud – direktor Jan Budar – z wjesnjanostu gmejny Malešecy, Matthiasom Seidelom. Pandemija poćežuje towarstwo Radiška a jeho dźěławosć jara, a tak běše konsens po rozmołwje, zo chcedźa wšitcy wobdźěleni nowy schodźenk dźěławosće zahajić a nowe projekty iniciěrować. Narěčeli su tež móžne ponowjenje domu, štož by w zamołwitosći gmejny móžne było.

Jana Pětrowa pokaza při rozmołwje na wužadanje, zo bě towarstwo Radiška dotal skerje z wobstaranjom (abo: nadźěłanjom) swójskeho podźěla za spěchowanske srědki a kóšty za wudźeržowanje (Betriebskosten) muzeja zaběrane. Towarstwowe, zetkawanske žiwjenje je w minjenych lětach dale a bóle ćerpjeło. Wona pisa w lisće na Domowinu a Załožbu za serbski lud, zo ma muzej „K. A. Kocora” kubłanski a za Serbow wulce wuznamny rěčny aspekt w zwisku ze zjawnym zajimom. Towarstwo Radiška trjeba dołhodobne rozrisanje za dalše financowanje šulskeho muzeja. Tute žadanje bě tež nastork za rozmołwu štwórtk.

www.schulmuseum-wartha.de

Dawid Statnik: „Towarstwo Radiška inwestuje wšu swoju móc do wudźeržowanja tutoho krasneho pomnika stawiznow. Podobnje dožiwjamy to tež na druhich městnach Łužicy. Aktualna situacija dźěławosć poćežuje. Chcemy tuž zhromadnje ze Załožbu za serbski lud wobstejnosće polěpšić. Wjeselu so tež, zo gmejna Malešecy so jasnje k swojej zamołwitosći wuznawa.”

Jan Budar, direktor Załožby za serbski lud, so po zetkanju w Stróži tež hladajo na list župy (hlej deleka) wupraja: „Za polěpšenje situacije serbskich wjesnych muzejow měło so rozrisanje namakać, kiž muzeje jako cyłk wobkedźbuje. Wone njejsu jenož dźěl našeho herbstwa, ale tež atraktiwne kubłanišća za šulerjow a turistow a wažne zetkawanišćo za towarstwa. Hdyž so něchtó namaka, kiž tajki koncept napisa, to Załožba rady podpěra.”

Leńka Thomasowa, amtěrowaca rěčnica župy „Jan Arnošt Smoler” Budyšin, je radźićelow Rady Załožby za serbski lud w lisće wo podpěru župam prosyła a k tomu zwuraznja:

„Sobu najnuzniši nadawk hladajo na generacisku změnu je wobchowanje našeho herbstwa, to potrjechi wosebje serbske wjesne muzeje w Hornjej a Delnjej Łužicy.” Čłonojo župneho předsydstwa  „Jan Arnošt Smoler” widźa nuznu potrjebu, zo by so hłownohamtska wosoba namakała, kotraž so wo serbske wjesne muzeje stara. Měła so zaběrać z finančnymi a materielnymi wuhotowanjemi muzejow, z konceptionelnym dźěłom a z přewodom wopytowarjow.

Thomasowa dale: „Župa přeje sebi jasny signal ze stron zamołwitych, zo so w lěće župow zamołwići tež za tutón wobłuk zasadźeja a zo so bórzomne rozrisanje namaka.” Na teritoriju Budyskeje župy potrjechi to wosebje šulski muzej „Korla Awgust Kocor” w Stróži a dom Měrćina Nowaka w Njechornju.