Župne předsydstwo župy „Handrij Zejler“ Wojerecy chce zhromadnje z městom puć z informaciskimi taflemi wo serbskich slědach we Wojerecach zwoprawdźić. Prěni wobšěrny naćisk za stacije tajkeho puća, kotryž chcedźa z partnerami a slědźerskim projektom gymnaziastow zrealizować, je Werner Sroka zdźěłał. Pomjenowanje by na přikład móhło „Via Sorabica HoyWoj” być. Zdobom su so na terminy lěta dojednali, mjez druhim štyri dźěłarnički wo serbskich nałožkach, tři zetkanja „rěčneje swětłownje”, popołdnjo za swójby a jězba župy do Slepoho na Dudakowy festiwal.

Regionalna rěčnica Sonja Hrjehorjowa rozprawješe wo njedawnym digitalnym wuradźowanju na přeprošenje wjesneho předstejićerja Delnjeho Wujězda, Franka Knoblocha, wo planowanej tamnišej „rěčnej manufakturje”, kubłanišću wosebje za serbsce wuknjacych dorosćenych. Wobzamknyli su čłonojo župneho předsydstwa na swojim posedźenju we Wojerowskim domje Domowiny oficielnu próstwu na přewjedźenje wurjadneje hłowneje zhromadźizny za rozrisanje problema tuchwilneje njepłaćiwosće modernizowanych wustawkow třěšneho zwjazka. Župa poruča, tutu „hłownu” z małym delegatnym klučom a někak 50 wobdźělnikami prezentnje w srjedźnej Łužicy přewjesć, dokelž je to organizatorisce jednorišo hač „hybridny” format. Na zetkanju předsydy Domowiny z nawodami towarstwow a župow 17. januara su za tajku wurjadnu hłownu zhromadźiznu pledowali.