Na swojej dźensnišej hłownej zhromadźiznje župy “Michał Hórnik” Kamjenc w Chróšćan “Jednoće” wolachu delegaća nowe župne předsydstwo. Tak bu dotalna županka Diana Wowčerjowa z 51 hłosami – a z tym jednohłósnje – wopodstatnjena.

Župne předsydstwo wokoło Zale Cyžoweje, Marhaty Deleńkoweje, Alfonsa Korjenka, Jany Hiccyneje, Hańžki Deleńkoweje, Claudije Kilankec, Jadwigi Kubašoweje, Marlis Młynkoweje, Kathariny Jurkoweje, wobohaćitaj jako nowačkaj Pančanka Kathrin Młynkowa a Ralbičan Markus Šołta. Z Ralbičanom je tuž tež Delanska kónčina po dlěšim času zaso w župje zastupjena.

Dale je wólbna zhromadźizna noweho čłona, spěchowanske towarstwo serbskeje wyšeje šule “Michał Hórnik” Worklecy z. t., přiwzała.

W přijomnej, wosobinskej atmosfery sćěhowachu delegaća zajimawej rozprawje županki wo projektach a dźěławosći župy. Dohromady přisłušeja tutej 1423 čłonkow a čłonow. Aktiwni su tući mjez druhim we wosom wjesnych towarstwach, šěsć młodźinskich klubach, sydom hudźbnych a pjeć kulturnych ćělesach a třoch Domowinskich skupinach.

Za lěto 2024 maja w župje hižo rjad planow na lisćinje. Hač je to na přikład swójbna schadźowanka, kotraž je zaso w Chrósćicach planowana, abo kubłanska jězba do Berlina. Tež chcedźa přewjesć rjemjeslniske wiki, za kotrež pytaja čłonojo župneho předsydstwa hišće městnosć.

Fota: Domowina/Božena Šimanec