Srjedu wječor, 16.3., su so předsyda Domowiny, županojo a předsydźa nadregionalnych čłonskich towarstwow třěšneho zwjazka na přewažnje digitalnym wuradźowanju schadźowali. Po tym zo dosć žadanjow za wurjadnej hłownej zhromadźiznu předleži, so wona hač do 7. junija wotměje. Zaměr někak połdrahodźinskeje Hłowneje budźe zaručenje prawniskeje płaćiwosće na lońšej hłownej zhromadźiznje wobzamknjenych změnow wustawkow po poručenjach hamtskeho sudnistwa. Předsyda Domowiny, Dawid Statnik, prosy předsydstwa cyłkow Domowiny, jako přihot hač do meje namjetowane korektury rozjimać.   

Druha tema běše informacija wo přichodnych kročelach narodneje organizacije w procesu změny strukturow. 2018 je wona konferencu „Quo vadis, Łužica?” přewjedła, 2020 je so radźiło, zajimy serbskeho ludu w zakonju zwjazka wo zesylnjenju strukturow brunicowych regionow zakótwić, nětko maja hač do 31.3. prěnje próstwy za spěchowanske srědki zapodać, kotrež budźe Załožba za serbski lud wobhospodarjeć. Na braniborskim boku su so woni hižo na wotpowědne wulkoprojekty dojednali.

Zdźerženje, dalewuwiće a rewitalizacija serbšćiny, medijowa produkcija a pedagogika, rěčna technologija, serbska rěč a kultura jako faktoraj regionaleje identity a zhromadnosće a zwičnjenje imaterielneho kulturneho herbstwa su stołpy spěchowanja ze stron załožby a su so 1.3. ze směrnicami skonkretizowali. Wobdźělnicy běchu sej přezjedni: Wothłosowane postupowanje je zmysłapołne. Dźěłowa skupina Domowiny je wot 2018 hižo někak 50 namjetow zrodźiła. Domowina chce nětko próstwu wo spěchowanje koncepcionelneje fazy zapodać. Wotpohlad je, regionalne zajimy wuslědźić a zwjazać. Na tutym zakładźe maja přichodne lěta konkretne projekty zwoprawdźeć. Dawid Statnik liči z konkretnymi projektami najpozdźišo wot lěta 2024.

Domowina jako bazodemokratiska organizacija chce swoju politisku móc jako syć 18 regionalnych a nadregionalnych zwjazkow a towarstwow z 200 cyłkami zasadźować, zo bychu naležnosćam serbskeje bazy puć rubali. W srjedźišću budu nowe regionalne rěčne rumy stać, za to je spušćomne dołhodobne financowanje rěčnje kwalifikowaneho personala jako stajna podpěra wšudźe tam trěbne, hdźež tuchwilu serbšćina we wšědnym žiwjenju prezentna njeje.

Tohodla prosy předsyda Domowiny zastupjerjow regionow a towarstwow, konkretne potrjeby zarjadej sposrědkować. Nimo tutoho hornca tak mjenowaneje „ruki 2” zwjazka je dale zasadnje móžno, w ramiku „ruki 1” zwjazkowych krajow nimo Lawskeho areala dalše serbske twarske projekty financować dać. Wšitcy zajimcy su přeprošeni, pjatk w 14 hodź. livestream wuradźowanja Domowiny ze serbskimi institucijemi wo kooperaciji na dobro wšěch regionow na Youtube-kanalu třěšneho zwjazka sćěhować.