W Choćebuskim měšćanskim muzeju staj so srjedu, 23.3., popołdnju na kromje dźěłarnički projekta „Zorja” za rewitalizaciju delnjoserbšćiny kubłanska referentkaDomowiny Katrin Suchec-Dźisławkowa a prof. Neyooxet Greymorning na rozmołwu zešłoj. Greymorning, prof. za antropologiju a indigene studije na Uniwersiće Montana w USA, je swoju maćeršćinu Arapaho, kotruž bě jenož hišće połsta ludźi nałožowało, ze swójskej metodu tak mjenowaneje dospołneje imersije wožiwił: Dorosćeni wuknu rěč - kaž dźěći swoju maćeršćinu - předewšěm z wobrazami a dospołnym zanurjenjom do noweje rěče.

Suchec-Dźisławkowa, kotraž je swoju maćeršćinu swojim pjeć dźěćom dale dała, widźi w projekće „Zorja” a nastorkach prof. Greymorninga wunošne impulsy tež za Hornju Łužicu. Serbske kubłanje měło so w tym zmysle změnić, zo budźe w přichodźe zaso wjac ludźi wšědny dźeń serbować. Na rozmołwje w Choćebuzu su so tež wjednik Rěčneho centruma Witaj w Delnjej Łužicy, Bernd Melcher, sobuiniciatoraj „Zorja”, Gregor Kliem a Maksimilian Hasacki, a studentka Shay Sullivan z USA wobdźělili.

Tež w srjedźišću měsačneho wuradźowanja regionalnych rěčnicow a referentow Domowiny steješe dopołdnja kubłanska politika. Referentka za naležnosće kubłanja, Katrin Suchec-Dźisławkowa, je na dobre zhromadne dźěło třěšneho zwjazka ze jeho nadregionalnym čłonskim cyłkom „Serbske šulske towarstwo” (SŠT) skedźbniła. Nazymu je zhromadny mały kongres z nošerjemi pěstowarnjow a zastupjerjemi staršich planowany. Tema: Zwyšenje rěčneho niwowa a lěpši přechod do serbskeje wučby na šulach. Suchec-Dźisławkowa tuchwilu lisćinu serbskorěčnych zwonkašulskich poskitkow po cyłej Łužicy zestaja, kotrež chcedźa hač do lěća šulam sposrědkować.

Wobraz 1: Sobuiniciatoraj projekta „Zorja” Maksimilian Hasacki (nalěwo) a Gregor Kliem (naprawo), prof. dr. Neyooxet Greymorning (srjedźa), Katrin Suchec-Dźisławkowa, Bernd Melcher a Shay Sullivan (w.l.),

wobraz 2: Bernd Melcher, Katrin Suchec-Dźisławkowa, prof. Neyooxet Greymorning (w.l.). Foće: Domowina/Marcel Brauman