W ramiku „Lěta Zejlerja a Kocora” so wot wutory, 26.4., hač do pjatka, 29.4., 220 šulerjow z wosom šulow ze Zejlerjom a Kocorom zeznawa. Projektne dny so na zahrodźe, w bróžni a w sydarni domu Domowiny we Wojerecach wotměja. Tón zhromadny projekt hornjołužiskich župow je Kamjenska župa „Michał Hórnik” we wubědźowanju idejow Simul+ po wothłosowanju mjez župami wuspěšnje zapodała.

Přihotowali su jón regionalne rěčnicy Sonja Hrjehorjowa (župa Wojerecy), Katja Liznarjec (župa Budyšin) a Katharina Jurkowa (župa Kamjenc), projektowa sobudźěłaćerka Rejzka Krügerowa, fachowej poradźowarce za serbšćinu, wučerce Katka Bukowa a Milenka Ertelowa, a socialnej sobudźěłaćerce Rěčneho centruma Witaj, Edit Šurowa a Claudia Kilankec.

Planowane su štyri stacije k temam fabule, hudźbne tworjenje, Zejler a Kocor jako spěchowarjej serbskeho burstwa a žiwjenje Zejlerja a Kocora: Tak budu šulerjo fabule čitać a z pomocu sceniskeho nadźěłanja z dźiwadźelnikom Jurjom Šimanom lěpje rozumić. Znaty spěw Zejlerja a Kocora ma so z hudźbnikom Symanom Hejdušku modernje nadźěłać. Serbska rejowanska a drastowa skupina Brětnja budźe wutoru a srjedu stare rjemjesła prezentować, štwórtk a pjatk přewozmje Kathrin Šwjelina, jedna z regionalnych rěčnicow z Delnjeje Łužicy, tón nadawk. Žiwjenju Zejlerja a Kocora móža so šulerjow w formje interviewa z wěcywustojnymi čłonami spěchowanskeho towarstwa zetkanišćo dom Zejlerja a Smolerja Łaz a ze šulskeho muzeja w Stróži krok po kroku bližić.

Wutoru, 26.4., su šulerjo z wyšeju šulow w Radworju a Slepom na městnje, srjedu, 27.4., wyšeju šulow w Budyšinje a Kulowje a z Lessingoweho gymnazija we Wojerecach, štwórtk, 28.4., z wyšich šulow w Ralbicach, Radworju a we Worklecach, pjatk, 29.4., ze serbskeho gymnazija w Budyšinje.

Projektne dny su medijam přistupne, za přizjewjenja a naprašowanja steji regionalna rěčnica we Wojerecach, Sonja Hrjehorjowa, k dispoziciji: Sonja.Hrjehorjowa@domowina.de , telefoniskej čisle: 03571 / 418 028, 01590 / 555 7474.