Štwórtk, 28. apryla, wot 10.30 hodź. česća Domowina – Zwjazk Łužiskich Serbow, gmejna Chrósćicy, ludnosć a 50 hosći ze Żarow a wokoliny, srjedźišća pólskeho dźěla Delnjeje Łužicy, mužow, kotrymž mamy so za wuswobodźenje našeho regiona z kwakle nacistiskeho režima a nacionalsocializma dźakować. Wšitcy ludźo, kotřiž chcedźa na tym podźěl brać, su přeprošeni, wopominanje na Fulkec hórce w Chrósćicach při monumenće a pomniku sćěhować.

Mjezy přesahowace zhromadne spominanje na dwaj tysac pólskich wojakow, kotřiž su poslednje dny Druheje swětoweje wójny mjez Halštrowom, Pančicami-Kukowom a Hórkami w boju přećiwo jednotkam SS a Wehrmachće žiwjenje přisadźili, wotměje so po dwěmaj lětomaj přetorhnjenja pandemije dla zaso. 2020 a 2021 bě jenož w najmjeńšim kruhu bjez delegacije ze susodneho kraja móžno.

Składnostnje połoženja wěnca jimaja so wjesnjanosta Marko Kliman, předsyda Domowiny Dawid Statnik a županka župy „Michał Hórnik” Diana Wowčerjowa słowa. Po tym wotměje so Boža słužba we wosadnej cyrkwi, pólscy hosćo přichadźeja z fararjom Pawełom Koniecznym. Po wobjedźe budźe w 13.30 hodź. spominanje při wjesnym křižu w Hórkach a w 14 hodź. we Łomsku při pomniku za wot nacijow zamordowaneho pólskeho nućeneho dźěłaćerja Stanisława Błażejczuka.

Hladajo na nadběhowacu wójnu Ruskeje přećiwo Ukrainje je lětuše wopominanje na wosebite wašnje zhromadne wuznaće k měrej a swobodźe bjez potłóčowanja. Předsyda Domowiny Dawid Statnik budźe při tym tež přikładnu solidaritu našich pólskich susodow z ludźimi w Ukrainje hódnoćić.

Hižo z lěta 1967 so w Chrósćicach z pomnikom na padłych pólskich wojakow spomina. W lěće 1980 je ludnosć z natwarom monumenta swoju dźakownosć a zwjazanosć z pólskim ludom zwurazniła. 20. septembra 1975 wopyta pozdźiši bamž Jan Pawoł II. jako Krakowski kardinal Karol Wojtyła tute wopomnišćo.