Jutře, wutoru, 11.5., w 17 hodź. so digitalna wuměna čłonow serbskich gremijow wotměje. Předsyda Domowiny, Dawid Statnik, je w mjenje pjeć předsydkow a předsydow serbskich gremijow čłonow zwjazkoweho předsydstwa, serbskeju radow w Braniborskej a Sakskej, Załožboweje rady a parlamentariskeje přirady Załožby za serbski lud na zoom-wuradźowanje přeprosył.

Hižo nimale lěto wudźeržuja předsydce a předsydźa tutych gremijow tydźenske mjezsobne wothłosowanje. Tak je so radźiło, prawnisku poziciju Serbow wosebje tež w procesu změny strukturow skrućić a přidatne srědki za Załožbu za serbski lud wubědźić. Nětkole dźe wo přichodnu zjawnu diskusiju wo nałožowanju srědkow załožby a w zwisku ze změnu strukturow. Z wida předsydy Domowiny je wažne, „sebi wuwědomić, hdźe chcemy w přichodźe priority nastupajo spěchowanje serbskeje rěče a kultury postajeć. Za to trěbne mam wšo a wšitkich zapřijace přemyslowanje.”

Tomu słuša tež jutřiša digitalna wuměna. Wo wuslědkach dźěłoweje rozmołwy budźemy srjedu rano ze zdźělenku informować. Nimo toho budu wobdźělnicy Wam za móžne naprašowanja k dispoziciji stać.