(Drježdźany, 3. małeho róžka 2020) Dźensa staj so předsyda frakcije CDU w Sakskim krajnym sejmje, Christian Hartmann, a předsyda serbskeho třěšneho zwjazka Domowiny, Dawid Statnik, na wuměnu měnjenjow zešłoj. Běštaj sej přezjednaj, zo stej serbska rěč a kultura wažny potencial za přichodne wuwiće regiona.Předsyda Domowiny, Dawid Statnik, praji: „Ze serbskosću ma Łužica něšto jónkrótne, štož ze žiwymi nałožkami zwjazanosć z domiznu posrědkuje a ze swojej rěču mjezsobnosći ludow wosrjedź Europy polěkuje.”A předsyda frakcije CDU Christian Hartmann: „Dyrbimy při strukturnej změnje we Łužicy serbsku rěč a kulturu bóle do kóždeho nadawka při wuwiću regiona zaprijec, zo bychmy jónkrótnu identitu regiona wobchowali.”Dalše temy běchu wukubłanje wučerjow, dołhodobne pjenježne wuhotowanje Załožby za serbski lud, kiž je potrjebje přiměrjene, a lěpše wothłosowanje terminow mjez wuběrkami krajneho sejma a Radu za serbske naležnosće při temach, kotrež Serbow nastupaja.Statnik: „W lěće 2017 bu w ramiku změny šulskeho zakonja prawo słyšenja za zastupnistwo serbskich zajimow rozšěrjene a wobdźělenje zastupjerjow Domowiny z poradźowacym hłosom na šulskich konferencach šulow ze serbskim poskitkom zawjedźene. To je kročel do směra wjace soburěčenja a sobupostajowanja. Fakt, zo je lěto a mjenje rěčnje dosahajcy kwalifikowaneho dorosta za serbske institucije, je za nas wšitkich wulke wužadanje.”Hartmann: „Aktualne koaliciske zrěčenje je dobry zakład, instrumenty serbskeho sobu- a samopostajowanja w dialogu mjez Domowinu, Radu za serbske naležnosće a krajnej politiku dale wuwiwać. Tón tydźeń so w Budyšinje kampanja Sakskeho statneho ministerstwa za wědomosć, kulturu a turizm za image serbšćiny zahaji. To je přinošk k tomu, zo so zjawna klima za serbšćinu dale polěpši, a je kulturnemu krajej Sakskej w cyłku na dobro.”