Składnostnje klětušeho lěta župow chce Domowina wuměnu skupin a towarstwow z Delnjeje, srjedźneje a Hornjeje Łužicy pohłubšeć: Na wčerawšim (srjedu) regularnym zetkanju prezidijia a zastupjerjow župy Dolneje Łužyce w Choćebuzu su woni tuchwilne přihotowanje na Europeadu jako jedyn z dobrych přikładow wuhódnoćili. Dalša wažna tema w diskusiji, na kotrejž so tež předsydka serbskeje rady Braniborskeje, Kathrin Šwjelina, wobdźěleše, bě přesadźenje praktiskich konkluzijow z ewaluacije wučby serbšćiny – w měrcu budźe rozmołwa z kubłanskej ministerku w Podstupimje, Brittu Ernst. Hižo dotal su zarjadowanja kaž w Hochozy w ramiku folklorneho festiwala takrjec tajny tip swójbam z Horneje Łužicy. Nawopak je to dźěćom a młodostnym z Delnjeje Łužicy „aha-efekt”, hdyž woni na přikład w Chrósćicach a na schadźowance w Budyšinje serbšćinu jako rěč wšědneho dnja dožiwjeja. Předsyda Domowiny, Dawid Statnik, ma tež wjac wuměny mjez łužiskimi kubłanišćemi za zmysłapołne, „za zajmawe nazhonjenja njetrjebaš so přeco do wukraja podać, tež w druhich regionach Łužicy móhli sej šulerjo wjele zajimawostkow wotkrywać.”