Po połlětnej přestawce zetka so wčera přihotowanski wuběrk Serbskeho mustwa w Pančicach-Kukowje. Trenarjo a mustwowi nawodźa žónskeho a mužaceho mustwa wuradźowachu, kak so přihoty na Europeadu pokročować hodźa. Ze stron zarjadowarja su jasne signaly, zo so europski turněr klětu wotměwa, dalokož to potom situacija pandemije dowoli.

Wšitcy wobdźěleni su sej wědomi, zo budu přihoty wužadace, wšako wosebje krajnej lize w Braniborskej a Sakskej, ale tež niše ligi połne hrajne plany maja. Njedźiwajcy toho pak budu nazymu wjacore zhromadne zeńdźenja koparkow a koparjow.

„Přihotowanske zetkanje dźensa je w prawym wokomiku. Dyrbimy nětko ze zapalom tam dale činić, hdźež smy w nalěću bohužel zastać dyrbjeli, jeli chcemy dobry wukon docpěć a Serbow 2021 derje w Korutanskej zastupować", běše zhromadny facit mustwowych nawodow.