Dźensa je so nowe Zwjazkowe předsydstwo Domowiny oficialnje skonstituowało. Je to zazběh předstejaceje legislaturneje periody hač do 2029. Fokus ležeše na mjezsobnym zeznaću a strategiskim wusměrjenju. Moderator posedźenja bě předsyda Dawid Statnik, kotrehož je minjenu sobotu hłowna zhromadźizna Domowiny woliła. Na posedźenju w Serbskim domje w Budyšinje kaž tež digitalnje wobdźělichu so 23 čłonki a čłonojo.

Dźěławosć gremija w dobje

Skrótka wuprajachu so někotři wo swojich předstawach dźěławosće gremija. Žycenje dr. Hartmuta Leipnera jo na pśikład, nic jano na górnoserbšćinu zepěraś, ale teke dolnoserbšćinu wužywaś. Alena Hiccyna doporuči dalše zhromadne dźěło direktnje mjez kubłanskej referentku Domowiny a Serbskim šulskim towarstwom, kotrež bě w zašłosći wuspěšne. Na prašenje Jana Ryćerja, hač ma Domowina prawiznika, zdźěli jednaćelka Judit Šołćina, zo dźěła třěšny zwjazk po potrjebje z eksternymi poradźowarjemi.

Wuhódnoćenje hłowneje zhromadźizny

“Běše to wobohaćace zarjadowanje, na kotrež sym rady přišoł a kotrež sej rady we pomjatku wobchowam. Profesionalny přihot a wurjadnje wuhotowane. Atmosfera bě wulkotna. Wutrobny dźak wšitkim, kotřiž so to zmóžnili.” tak čłon Jan Bělk.

Diana Wowčerjowa zwurazni přesłapjenje nastupajo rozprawnistwa Maximiliana Grubera w Serbskich Nowinach: “Po mojim měnjenju je to degraděrowanje delegatkow a delegatow. Pokaza to skerje njezrozumjenje awtora, kak hłowna zhromadźizna dźěła. Delegaća su wědźeli, wo čim so rěči, zo njejsu jenož wothłosowacy gremij. Prašam so, hač znaje redaktor scyła dźěławosć gremijow.”

Dr. Hartmut Leipner jo tomu pśigłosował. “Ceła zgromaźina jo była wjelgin derje pśigótowana. W artiklu njejo se glědało, kak derje jo se interaktiwna rozpšawa raźiła”, wuzběhny Leipner.

Prěnja diskusija gremija bě wutworjenje dźěłowych wuběrkow. W fokusu steješe prašenje, w kotrym měrje je wuběrk trěbny abo hač dosaha dźěłowa skupina na wobmjezowany čas abo na temu poćahowana. To diskutowachu čłonki a čłonojo zwjazkoweho předsydstwa při štyrjoch wšelakorych blidach. Temy sahachu wot kubłanja, prawniskich prašenjow, zjawnostneho dźěła do strategiskeho wusměrjenja. Diskusija wo wuběrkach so dale wjedźe. 

Dale předstajichu so čłonki a čłonojo zwjazkoweho předsydstwa mjez sobu. Zjawnosći prezentowachu so hižo do hłowneje zhromadźizny. Portrety buchu mjez druhim w Serbskich Nowinach wozjewjene. Wot kubłanja, samozrozumliwosće za serbstwo w hospodarstwje hač k  wuměłstwu, młodźinskim temam, serbskej rěči a rewitalizaciji – zajimy čłonkow a čłonow za wólbnu dobu su wšelake.  

Nimo toho rozłožichu sobudźěłaćerki a sobudźěłaćerjo zarjada Domowiny pod nawodom jednaćelki Judit Šołćineje skrótka swoje dźěłowe wobłuki.

Dale zeznachu čłonki a čłonojo prawniske a organizatoriske zakłady třěšneho zwjazka: wustawki, jednanski porjad, dźěłowe plany a strukturu gremijow Domowiny.

Konstituowanje noweho woleneho gremija česći tež zapósłanča Sakskeho krajneho sejma Elaine Jenčec. Wona bě gremijej wosobinski postrow sposrědkowała. “Sym přeswědčena, zo wuskutkujeće ze swojim angažementom a swojej rozpalitosću wjele pozitiwneho za serbsku kulturu, naš region a ludźi. Za to přeju Wam trěbnu móc, wotewrjenych partnerow a inspiraciju za přichodne wužadanja”, tak mjez druhim rěka.

Na kóncu doprajichu sej přitomni hišće terminy posedźenjow za lěto 2025. Přichodne posedźenje zwjazkoweho předsydstwa budźe 13.06.2025 we Wojerecach.

Z tutym konstituowacym posedźenjom je nowe zwjazkowe předsydstwo dźěłokmane a zwólniwe, so z angažementom a zamołwitosću za naležnosće Serbowkow a Serbow zasadźować.

Pozadk:

Domowina je politiske zastupnistwo Serbow. Wotpowědnje § 5 Sakskeho serbskeho zakonja móža so zajimy Serbow “na krajnej, regionalnej a komunalnej runinje wot jednoho třěšneho zwjazka serbskich zwjazkow a towarstwow zastupować.“ Runja tomu postaja Braniborski serbski zakoń, kotryž wuwjedźe w § 4a (2) “Připóznaće třěšneho zwjazka serbskich zwjazkow a towarstwow přewjedźe so přez za naležnosće Serbow zamołwite ministerstwo po słyšenju Rady za naležnosće Serbow při krajnym sejmje”.

Domowinje přisłuša wjace hač 7.600 čłonow (staw: nowember 2024). Hłownje zasadźuje so za zachowanje a dalewuwiwanje serbskeje rěče, kultury a tradicijow. Zwjazkowe předsydstwo je najwyši gremij mjez hłownymaj zhromadźiznomaj.