Po wuprajenju ministerskeho prezidenta Schleswigsko-Holsteinskeje Daniela Günthera (CDU) ma tamniše knježerstwo zhromadnje ze Sakskim knježerstwom předwidźane, zwjazkowej radźe namjetować, slědowacy wotrězk do artikla 3 wustawy (zakładneho zakonja za Zwjazkowu republiku Němska) zapřijeć:“Stat dźiwa na identitu awtochtonych mjeńšin a ludowych skupin, kotřiž su po ramikowym dojednanju k škitej narodnych mjeńšin Europskeje rady w Němskej připóznate.” (Der Staat achtet die Identität der autochthonen Minderheiten und Volksgruppen, die nach dem Rahmenübereinkommen zum Schutz nationaler Minderheiten des Europarats in Deutschland anerkannt sind.)Předsyda Domowiny Dawid Statnik wita iniciatiwu: “Statny minister a šef Sakskeje statneje kenclije Oliver Schenk je mje wčera telefonisce wo tym informował. Wjeselu so, zo podpěratej wobě knježerstwje tutu iniciatiwu. Wona bě wušła z prócowanjow mjeńšinow. Nadźijam so, zo so tež dalše zwjazkowe kraje namjetej přizamknu a zo by była tuta wažna iniciatiwa wuspěšna.”Mjeńšinowa rada Němskeje, kotrejž tež DOMOWINA přisłuša, je so 7.6.2019 z Danielom Güntherom, kotryž je runočasnje amtěrowacy prezident zwjazkoweje rady, zetkała. “Smy knjeza Günthera prosyli, w tutych napinanjach nic popušćić”, praji Dawid Statnik a doda: “Hižo tehdy je mi sakske knježerstwo přilubiło, iniciatiwu sobu podpěrać, štož nas w našim prócowanju pohonjowaše.”Dotal njejsu mjeńšiny we Zakładnym zakonju naspomnjene. Wuwzaće tworješe wustawa Weimarskeje republiki, kiž rjadowaše w artiklu 113 rjadowaše: “Die fremdsprachigen Volksteile des Reichs dürfen durch die Gesetzgebung und Verwaltung nicht in ihrer freien, volkstümlichen Entwicklung, besonders im Gebrauch ihrer Muttersprache beim Unterricht, sowie bei der inneren Verwaltung und der Rechtspflege beeinträchtigt werden.”