Regionalne powědaŕki a referenty serbskego kšywowego zwězka Domowina su ze swójim prědnym wobradowanim lěta w Chóśebuzu swójo zgromadne źěło za 2020 startowali. W tom lěśe wujźo kórta z pśeglědom Domowinskich župow a kupkow ako teke serbskich towaristwow, online a we wuśišćanej formje. K tomu pśidu w tej chyli pśiźěła z regionow. Rownocasnje dej se wuměna informacijow wósebnje terminow pó digitalnej droze pólěpšyś.Domowina buźo se w ramiku “Źěłarnje pśichod Łužyca” na wuźěłanju pśikłada strategiskich pśistupow za wěcejrěcny modelowy region w srjejźi Europy wobźělowaś.K tomu jo gronił Marko Kowaŕ, jadnaŕ Domowiny: “Naše mjasecne wobradowanja su wuraz togo, až my ako kšywowy zwězk kšuśe w praktiskem źěle regionow zakokulone smy. Woplěwamy kulturu płoneje hirarchije a partnaŕskego zgromadnego źěła. Rowno w casu strukturneje změny jo wažne, až my Serby ako aktiwny źěl cełeje towarišnosći zjawnje stawnje prezentne smy. Dla togo comy nawězaś na prědne sakske gótuj-sobu-wuběźowanje a bramborske wuběźowanje „serbski pśichod: Łužica” a angažěrowanym iniciatiwam na pomocy byś.