W zarjedźe Domowiny ma so wot 1. junija městno młodźinskeje referentki/młodźinskeho referenta z tydźenscy 30 hodźinami dźěłowe časa znowa wobsadźić. “Pytamy wosobu, kiž rěči serbsce, kiž móže derje organizować a serbske młodźinske cyłki podpěrać”, praji jednaćel Domowiny Marko Kowar. Wuměnjenje za přistajenje je pedagogiske, socialno-pedagogiske abo za dźěłowy wobłuk přirunajomne wysokošulske wotzamknjenje. Cyłkowne wupisanje je wozjewjenje na internetnej stronje Domowiny pod https://www.domowina.de/hsb/aktualnosce/dzelowe-poskitki-praktika-wukublanske-mestna/. Serbske młodźinske skupiny a kluby z Hornjeje Łužicy su so kónc měrca na 19. hłownej zhromadźiznje Domowiny předstajili a wo zarjadnisku podpěru prosyli.