Ku aktuelnej situaciji serbskego žywjenja pód wuměnjenjami Corona-krize groni wjednica Rěcnego centruma Witaj w nosaŕstwje serbskego kšywowego zwězka Domowina, dr. Beata Brězanowa:“Naše familije muse w tej chyli pód wuměnjenjami napšawow k wobgranicowanju Corona-pandemije wurědne wupominanja zmejstrowaś. Wóstańśo doma! To źe nejpjerwjej raz rědnje klincy, ale chtož ma swój běrow naraz doma a musy se k tomu teke hyšći wob ceły źeń wó wobstaranje źiśi staraś, trjeba cesto kšute nerwy. Dla togo jo wjelgin derje, až dajo źeń wóte dnja wěcej póbitowanjow za zaběru w serbskej rěcy we familiji a ze źiśimi pśez internet.Źěkujomy se starjejšym za swóju sćerpnosć, wutrajnosć a angažement rowno w tych dnjach a wšym towaristwam, institucijam a jadnotliwym wósobam, kenž se wó pśidatne digitalne póbitowanja staraju. Serbski lud pokazujo z tym kšutu zwězanosć a kreatiwnosć w situaciji, kenž jo za nas wšych jadnorazowa. Som kšuśe pśeznanjona: Gaž tak dalej gótujomy, wujźo našo serbske žywjenje na kóńcu zmócnjone z teje Corona-krize. A to móžomy pón něźi zasej zgromadnje wóswěśiś.”