Budyšin, 02.02.2024

Na swojim dźensnišim posedźenju su čłonojo Zwjazkoweho předsydstwa Domowiny rozprawu RCW kaž tež  dźěłowy plan zarjada a RCW schwalili. Nowosć za lěto 2024 je “Myto za młodu ekscelencu w dolnoserbšćinje”, kotrež je Rěčny centrum Witaj (RCW) do hospodarskeho plana zapisał. Zarjad wusměri swoju dźěławosć wotnětka dołhodobnišo a to na dwě lěće. Wažne ćežišćo su lětuše wólby krajneju sejmow w Sakskej a Braniborskej. Za to namołwja Zwjazkowe předsydstwo  wšěch zajimowanych Serbow, prašenja za wólbne kopolaki zapodać (hlej přidatna zdźělenka).

Nimo toho wuzwolitej so lětsa a klětu nowej Serbskej radźe w Sakskej a Braniborskej. Zakłady za wólby serbskich radźićelow chce zarjad Domowiny stworić a při tym wosebitosće a wšelakore postupowanje we woběmaj krajomaj wobkedźbować. Tež komunalne wólby a wólby do Europskeho parlamenta w juniju 2024 budu na župnych runinach kaž Domowinu zaběrać. Za to chce so zarjad z dalšimi akterami a partnerami wothłosować a serbske zajimy wobkedźbować.

Hladajo na nowe pjate financne zrěčenje za Załožbu za serbski lud, kiž dyrbi nabudź wot 2026 swoju płaćiwosć, přewodźa a přihotuje Domowina jako zastupjerka zajimow Serbow proces zwoprawdźenja we wuskim zhromadnym dźěle ze wšitkimi serbskimi institucijemi, runje tak kaž we wothłosowanju ze Załožbu za serbski lud. Wosebje 2024 budźe wuše zhromadne dźěło z nawodami serbskich institucijow hišće wažniše, wšako pokazachu so w dotalnych rozmołwach prěnje signale, zo budźe ćežko niwow tuchwilneho financneho zrěčenja dźeržeć móc.

Nimo hospodarskeho plana 2024, kiž wučinja dohromady 4,8 milion €, wobhospodarja zarjad tež w lěće 2024 wjace hač 20 wšelakich projektow z třećich srědkow (tute wučinja přidatnje někak 2,7 milion €), štož wučinja nimale 40 % etatoweho wolumena. Su to hłownje nošerstwa Domowiny za projekt šulskeho socialneho teama, za projekt Sotra, mjeńšinoweho sekretariata, serwisoweho běrowa we Wojerecach a projekta “Syć za serbsku rěč a regionalnu identitu“ (ZARI).

Diana Wowčerjowa, županka župy “Michał Hórnik”, rozprawješe wo nowowuzwolenym župnym předsydstwje loni. Kubłanska jězba powjedźe čłonow w měrcu na slědy Šeracha a wustajeńcu wo pčołarjenju do Berlina. Kubłanske projekty so derje přiwzaja, na to pokaza bohate wobdźělenje. Kruty stołp dźěławosće su workshopy wokoło narodneje drasty. Zjawne zarjadowanja, kaž na př. filmowa nóc w Kopšinje loni, wuhotuja hromadźe z čłonskimi towarstwami. Nowe puće chcedźa lětsa ze spěwnym wječorom z chórami w župje kročić. Hižo dlěje zaběra župu muzej Ćišinskeho w Pančicach-Kukowje. Wobsahowje je Trudla Kuringowa projekt naćisnyła, při přesadźenju wuhotowanja maja wjacorych partnerow. Županka pokaza na to, zo pyta so nětko wosoba, kiž by prawidłownje přez muzej wjedła.

Župje přisłuša tuchwilu 1.423 čłonow.

Zwjazkowe předsydstwo Domowiny je dale čłonstwo Domowiny w Błótowskim towarstwje z.t. wobzamknyło. Towarstwo zastupuje zajimy komunow, towarstwow, předewzaćow a institucijow regiona. Wone zasadźuje so mjez druhim za zesylnjenje wjesneho hospodarstwa a turizma a je nošer LEADER regiona Błota +.

W minjenymaj dwěmaj měsacomaj je mytowanski wuběrk z porjadami “Myta Domowiny”, “Myta “Myta Domowiny za dorost” a “Čestneho znamješka Domowiny” předźěłał, tak, zo nasta zjednoćeny porjad, kotryž zwjazkowe předsydstwo dźensa schwali.

Na swojej hłownej zhromadźiznje loni w decembrje je Serbske šulske towarstwo politiske žadanja za serbske šulstwo w Sakskej schwaliło. Čłonojo zwjazkoweho předsydstwa Domowiny wosom žadanjow SŠT, kiž je towarstwo tež hižo hromadźe z wjednistwami wšěch serbskich šulow diskutowało, jednohłósnje podpěruja. Jedne z wosom žadanjow je, zo trjebaja serbske šule zhromadny serbski referat na LaSuB a SMK.

Po intensiwnej, połlětnej fazy diskusijow je programowa komisija prěni naćisk programa Domowiny předpołožiła. Tuchwilny naćisk wobsahuje sydom dypkow. Zwjazkowe předsydstwo wita wersiju a da ju do zjawneje diskusije. Předwidźane je, na 23. hłownej a wólbnej zhromadźiznje Domowiny 2025 nowy program Domowiny schwalić. Zaměr je, tutón lětsa šěroko w regionach, w župach a towarstwach diskutować, tak předsyda Dawid Statnik.

Čłonojo Zwjazkoweho předsydstwa prawicarske móranja, kajkež běchu njedawno na twarjenju Němsko-Serbskeho ludoweho dźiwadła w Budyšinje, raznje zasudźa. We wozjewjenju rěka: Štóž tajku symboliku wužiwa, njeje stawizny zrozumił, ma politiske prawicarskoekstremistiske nahlady, kotrež wotpokazujemy, abo chce njeměr šěrić.

Hokaty křiž na serbskej instituciji, kotraž předstaji tuchwilu hru wo Serbowce židowskeho pochada, kotraž je ideologije nacijow dla w koncentraciskim lěwje zahinyła, je jasny nadběh na našu demokratiju a žada sebi wot nas wšitkich, zo naše we wustawje zapisane zakładne prawa zakitujemy.