Zwjazkowe předsydstwo Domowiny je kónc septembra serbske zjednoćenstwa namołwiło, hač do 1. nowembra 2018 namjetować kandidatow za wuzwolenje serbskich zastupjerjow ze Sakskeje do rady Załožby za serbski lud na dobu 2019-2023. Hač do 01.11.2018 je dźesać wosobow podało zwólniwosć, za załožbowu radu kandidować.Kaž předsyda Domowiny Dawid Statnik dźensa zdźěli, posrědkuja so zapodaća a namjety wólbnej komisiji, kotraž wólby přihotuje.  Wólby sakskich čłonow załožboweje rady přewjedu so 14.12.2018 w ramiku posedźenja Zwjazkoweho předsydstwa Domowiny w Chrósćicach. Po wustawkach Załožby za serbski lud § 5 wotstawk 2 dypk 1 přisłušeja jeje radźe šěsć zastupjerjow serbskeho ludu, z toho štyrjo ze Swobodneho stata Sakska a dwaj z Kraja Braniborska. Kóždy z nich ma měć naměstnika.Na zakładźe protokoloweje noticy k statnemu zrěčenju wo wutworjenju Załožby za serbski lud woli braniborska Rada za naležnosće Serbow zastupjerjow serbskeho ludu z Braniborskeje do załožboweje rady. W Sakskej ma tutón nadawk Zwjazkowe předsydstwo Domowiny po wothłosowanju ze serbskimi zjednoćenstwami.Tuchwilna wólbna doba rady Załožby za serbski lud skónči so w měrcu přichodneho lěta.