Krótko do hód (19.12.23) zetka so wuběrk Serbskeho mustwa posledni raz w tutym lěće. W srjedźišću steješe wuhódnoćenje lětušeje dźěławosće a wuslědk wulosowanja w Haderslev. Milan Funka, kotryž bě so na zarjadowanju w Danskej njedawno wobdźělił, rozprawješe.

Frank Ričel hódnoći wuslědk takle: "Dyrbimy nětko wšitko za to činić, zo spěšnje rozšěrjeny kader nastajimy, z kotrehož sej potom najlěpšich za Europeadu nominujemy. Němcy z Pólskej su jara wužadacy lós a přećiwnik, kotryž budźe wšitko wot našeho mustwa žadać, hdyž chcemy předkoło přetrać".

Franciska Hellnerowa, mustwowa nawodnica žónskeho mustwa hódnoći takle: "Zo nimamy najprjedy raz jara sylnej mustwje z Južneho Tirola a Koroški w předkole widźu jako dobre. Njedźiwajcy toho sym sama jara wćipna na našich přećiwnikow, wšako smy so tež my z tójšto hrajerkami, wosebje z Delnjeje a srjedźneje Łužicy womłodźili. Nadźijam so tuž, zo změjemy dobry a wosebje połny kader."

Dale wuradźowaše wuběrk wo wotběhach při městnje a wužadacej logistice, wšako su hrajne městna něhdźe 80km wot sebje zdalene. Tučasnje pytaja mustwje hišće za přebywanišćom, kotrež budźe w idealnym padźe w bliskosći Flensburga.

Spočatk januara přewjeduja so treningowej lěhwje we Werdau (žony) a Choćebuzu (muže). Frank Norbert Sieg a Franciska Hellnerowa  předstajištaj konkretny wotběh. Přizjewjenske lisćiny za treningowe lěhwo su połne, zdźělitej wobaj cyłkaj Serbskeho mustwa.

Strowi 

Clemens Škoda, nawoda delegacije Serbskeho mustwa