Předsyda Domowiny Dawid Statnik poby dźensa, dźeń po konstituowanju 21. zwjazkoweho sejma, na prěnich politiskich rozmołwach w Berlinje. W srjedźišću tutych stejachu nětčiše koaliciske jednanja a zaměr w tutych serbske zajimy zakótwić.

Tak zetka so ze zapósłanču Kathrin Michel (SPD) a zapósłancom Florianom Oestom (CDU). Nimo toho zetka so ze zapósłancom Stefanom Seidlerom, kotryž je jako zastupjer mjeńšinoweje strony SSW čłon zwjazkoweho sejma. W rozmołwje wuzběhny Seidler, zo je za njeho wažne, nimo zajimow Danow, Frizow a Sinti a Romow, tež zajimy Serbow zastupować.

Jako jedyn z centralnych dypkow přichodnych měsacow pomjenowa Statnik financowanje Załožby za serbski lud. Podźěl zwjazka wučini połojcu cyłkowneho etata załožby. “Njehladajo cyłkowneje napjateje financneje situacije w zwjazku a krajomaj Braniborska a Sakska je wažne, spěchowanje w dotalnej wyskosći zdźeržeć. Tomu wjedźemy rozmołwy z wšelakimi partnerami.”, tak předsyda Domowiny.

Zwjeselace je připrajenje zapósłancow Michel a Oest, so na hłownej zhromadźiznje Domowiny, kotraž budźe 5. apryla w Budyšinje, wobdźělić.

Fota: Domowina/Božena Šimanec