Pśed lětom, dnja 11. decembra 2020, bu wokrejs Dubja-Błota spěchowański cłonk serbskego kšywowego zwězka Domowina. Wón jo stakim prědne komunalne zjadnośeństwo, kenž jo do takego wuskego zwiska z Domowinu, Zwězkom Łužyskich Serbow, stupił.

K tomu jo gronił Dawid Statnik, pśedsedaŕ Domowiny: “Pśi nejnowšem wuběźowanju Załožby za serbski lud ‘Rěc zwězujo’ su mjazy dobyśaŕskimi idejami ned styri z wokrejsa Dubja-Błota. Toś ten aktuelny wuspěch znani wó towarišnostnej dynamice, kenž jo se wósebnje pó zastupjenju do słužby Sabriny Kušcyneje ako prědna głownoamtska zagronita za serbske nastupnosći we wokrejsu zachopjeńk lěta 2020 wuwijała a se z pśistupom ako spěchowański cłonk Domowiny 2020 dalej zmócniła jo.

Ze swójimi směrnicami za spěchowanje serbskego luda jo wokrejs měritka póstajił. Ze swójeju ofensiwneju dwójorěcnosću w zjawnem rumje a nic naslědku z nimsko-serbsken wóźecym systemom woglědari w zastojnstwowem centrumje Parsk direktnje pśi měsćańskej granicy Barlinja jo wokrejs Dubja-Błota móst ze sebskeje Łužyce do głownego města Nimskeje. Wjaselimy se na dalšne spómóžne zgromadne źěło!”  

Krajny raźc Stephan Loge: “W zajźonosći jo politika cesto to serbske slědk tłocyła a toś comy my źinsa z našeju politiku ako wokrejs serbskemu pśipomagaś k nowemu wuwiśeju. Prědny serbski literarny a muzikowy swěźeń w našom wokrejsnem měsće Lubin (Błota) z awtorami a muzikarjami z Dolneje a Górneje Łužyce jo w tom lěśe wuspěšnje pokazał, až teke pód tymi we chyli śěžkimi ramikowymi wuměnjenjami serbski profil našogo wokrejsa dalej wóstśimy.

Teke w pśiducem lěśe comy nowe pokazaś, tak z knigłami “Wěcej ako drastwa... Serbske žywjenje we wokrejsu Dubja-Błota”, na kótarychž se we chyli w kooperaciji ze zagroniteju za serbske nastupnosći a wokrejsnym archiwom źěła. Woplěwujomy pśi spěchowanju kultury, sporta a Serbow cełostny pśistup, pśeto serbskosć jo integralny wobstatk identity cełego wokrejsa. Wjele źiśownjow jo pśi integraciji serbskeje kultury a rěcy we wšednem dnju južo na dobrej droze, teke na wšakich šulach dajo póbitowanja serbšćiny, to sebje žycymy w pśichóźe na wjele wěcej městnach.

Ako wokrejs smy gromaźe ze Šulu za dolnoserbsku rěc a kulturu za pśistajonych zastojnstwa, w turistiskem managementu ako teke we wobceŕku źiśownjow a hortow póbitowanje za dalejkubłanja w serbskich stawiznach a serbskej kukturje natwarili. To serbske stoj pla nas we wokrejsu Dubja-Błota rownopšawnje w srjejźišću towarišnosći. W tom zmysle comy rad ruka w ruce z kšywowym zwězkom Domowina pśiznamje jadnoraznosći Łužyce dalej doprědka spóraś.”

Wobraz pśepódaśa pšosby wó pśiwześe dnja 9.12.2020, kótarež jo Zwězkowe pśedsedaŕstwo Domowiny dwa dnja pózdźej jadnogłosnje pśiwzeło: zagronita za serbske nastupnosći Sabrina Kušcyna (Kuschy), krajny raźc Stephan Loge, pśedsedaŕ Domowiny Dawid Statnik a tegdejšy wokrejsny kulturny decernent Carsten Saß (wót lěwa napšawo). Foto LDS

https://www.wokreisel.de/news/3/694886/firmennachrichten/wie-sorbisch-ist-dahme-spreewald-kak-serbska-jo-dubja-b%C5%82ota.html