Dźensa wotměchu čłonka a čłonojo prezidija w Budyskim Serbskim domje swoje 40. posedźenje w aktualnej legislaturnej periodźe.

Hłowna tema bě přihotHłowneje zhromadźizny Domowiny, kotraž budźe 05.04.2025 w Budyšinje. Prezidij je so z wjacorymi dypkami zaběrał, kotrež ma hłowna zhromadźizna schwalić. Su to mj. dr. namjety:

• za změnu wustawkow
• za wólbny porjad Domowiny
• za program Domowiny.

Pozadki: We wustawkach su so nimo stilistiskich změnow tež korektury přewjedli, kaž na přikład dwojenje formulacijow abo wariacije w rěčnych wersijach. Dale je so do wólbneho porjada pasus zapisał, kotryž wuzamknje kandidatow, kotrež mj. dr. přećiwo swobodno-demokratiskemu zakładnemu porjadej agěruja. Minjeny štwórtk je so programowa komisija posledni raz schadźowała, zo by kónčny naćisk programa Domowiny wudźěłała (foto). Něhdźe 1,5 lět su Domowinjenjo a zajimcy na tutym dźěłali. Zjawnosć bě přeprošena, namjety zapodać.

Nimo toho je prezidij za dobu 2025-2029 Judit Šołćinu jako wěcywustojnu wobydlerku do přirady za serbske naležnosće města Budyšin powołał.

Pozadk: Loni je měšćanska rada swoje wustawki změniła. Při tym je wobzamknyła, přiradu za serbske naležnosće wutworić. Dotalny dźěłowy kruh přeměni so do přirady. Tuta poradźuje měšćansku radu, kaž tež wyšeho měšćanostu we wšěch serbskich naležnosćach. Nadawk přirady je wustawki města Budyšin za spěchowanje serbskeje rěče a kultury zwoprawdźić. Nimo Domowiny maja tež Załožba za serbski lud, frakcije měšćanskeje rady kaž tež wyši měšćanosta prawo, wěcywustojnu wobydlerku abo wěcywustojneho wobydlerja namjetować.